സന്തോഷ് സെബാസ്റ്റ്യന്‍
ചര്‍ച്ച പുരോഗമിക്കുകയാണ്
വിഷയം കടലാണ്
കടലിലെ ഓളങ്ങളും
പൂന്തുറ സ്റ്റുഡിയോയില്‍
നിന്ന് ചേരുമത്രേ
വരാന്തയിലെ
വാരാന്ത്യ ചര്‍ച്ചകളിലും
ഇഴ കീറുന്ന
വിഷയം കടലാണ്
ഓഖിയെ അന്വേഷിച്ചവര്‍
ചുഴലി കണ്ടില്ല
കാണാനായി ചെന്നവരെ
കടലും എടുത്തു
കരയുന്നവര്‍ക്കു
കരയാം; കാരണം
കരച്ചില്‍ ഒരു ഫാഷന്‍ അത്രേ
എന്ന് മന്ത്രി പേരമ്മ
മണിക്കൂറുകള്‍ ദിവസങ്ങളായി
ദിവസങ്ങള്‍ മാസങ്ങളായി
ഓഖിയെ കണ്ടവരുണ്ടോ
കണ്ടാല്‍ ഒന്നു ചോദിക്കണേ…
കാരണം അക്കൂട്ടത്തില്‍
എന്‍റെ അച്ഛനുണ്ട്
എന്‍റെ അനിയനുണ്ട്
എന്‍റെ അമ്മാവനുണ്ട്
എന്‍റെ അമ്മയുടെ കണ്ണീരും ഉണ്ട്
കടലിലെ ഓളപ്പരപ്പില്‍ നിന്ന്
ക്യാമറാമാന്‍ ചേട്ടനോടൊപ്പം
ചര്‍ച്ച പുരോഗമിക്കുകയാണ്
വിഷയം കടലാണത്രേ…