കെ.വി. ബേബി
ഈയിടെയായി
ഫോണ്‍ വിളിച്ചാല്‍ കേള്‍ക്കുന്ന
ആ ചുമ എന്‍റെയാണ്.
സത്യം.
സത്യം.
ആകാശവാണിയില്‍
കവിത ചൊല്ലാന്‍ പോയപ്പോള്‍
റെക്കോഡിങ്ങിനിടെ
ചുമ വന്നതും ,
നിറുത്താതെ ചൊല്ലിപ്പൊയ്ക്കോളൂ
ചുമയെല്ലാം എഡിറ്റിങ്ങില്‍ പൊയ്ക്കോളും
എന്നൊക്കെപ്പറഞ്ഞതിലൊന്നുംതന്നെ മറന്നിട്ടില്ല.
എന്നാല്‍
വാനൊലി
എന്നെ പറ്റിയ്ക്കുകയായിരുന്നോ ?!
അവര്‍
എഡിറ്റിങ്ങില്‍
ചുമ ചോര്‍ത്തിയെടുത്തു
സൂക്ഷിച്ചു വച്ചു,
സുവര്‍ണ്ണാവസരത്തിലുപയോഗപ്പെടുത്താന്‍ .
ദാ
ഇപ്പോള്‍
എന്‍റെ അനുവാദമില്ലാതെ
ഉടമ്പടിയിലേര്‍പ്പെടാതെ
പ്രതിഫലം തരാതെ
ചുമയെടുത്തുപയോഗിക്കുന്നു.
ഈ ചുമയുടെ കോപ്പിറൈറ്റ് എനിക്ക്.
ഒന്നുകില്‍
അനുവാദം വാങ്ങി
ഉടമ്പടിയിലേര്‍പ്പെട്ടു
പ്രതിഫലം തരിക.
അല്ലെങ്കില്‍
മരിയ്ക്കും മുമ്പെങ്കിലും
ചുമ തിരിച്ചുതരിക.