ചെന്നൈയിലെ എലിയറ്റ് ബീച്ചിനു സമീപത്തു ചെല്ലുന്നവര്‍ക്ക് അവിടെയൊരു വലിയ ഫ്രിഡ്ജ് വച്ചിരിക്കുന്നതു കാണാനാവും. വിശന്നു വലയുന്നവര്‍ക്ക് അതില്‍ നിന്ന് ആഹാരമെടുത്തു കഴിക്കാം. ആരും ഒന്നും ചോദിക്കില്ല, പണം കൊടുക്കുകയും വേണ്ട. അതുപോലെ ആഹാരം നല്‍കാന്‍ താത്പര്യമുള്ളവര്‍ക്ക് അതില്‍ കൊണ്ടുപോയി വയ്ക്കാം — കമ്യൂണിറ്റി ഫ്രിഡ്ജ് എന്ന ഈ ആശയം ആവിഷ്ക്കരിച്ചത് ഓര്‍ത്തോഡന്‍റിസ്റ്റായ ഇസ ഫാത്തിമ എന്ന വനിതയാണ്.
ഫ്രിഡ്ജില്‍ നിന്നു കുറച്ചു പഴങ്ങളും ജ്യൂസും എടുത്തു കഴിച്ച 72-കാരനായ ജെ. കുമാര്‍ എന്നയാള്‍ പറഞ്ഞതിങ്ങനെ: "എന്നെപ്പോലെ ആരോരുമില്ലാതെ അലയുന്നവര്‍ക്ക് ഇതൊരു അനുഗ്രഹമാണ്. സാധാരണഗതിയില്‍ ഉച്ചഭക്ഷണം കിട്ടാത്തപ്പോള്‍ വിശപ്പു സഹിച്ചു കഴിയുകയാണു ചെയ്യുന്നത്"
ഇന്ത്യയില്‍ പകുതിയലധികം ഭക്ഷ്യവസ്തുക്കളും ഉപയോഗശൂന്യമായി പാഴായിപ്പോവുകയാണെന്ന് ഇസ ഫാത്തിമ പറയുന്നു: "യഥാര്‍ത്ഥത്തില്‍ നമ്മുടെ ജനസംഖ്യയുടെ ഇരട്ടിയിലധികം പേര്‍ക്ക് ഭക്ഷണം കൊടുക്കാനാകും. എന്നാല്‍ 50 ശതമാനം ഭക്ഷണപദാര്‍ത്ഥങ്ങളും പാഴാക്കിക്കളയുകയാണ്. കുപ്പത്തൊട്ടിയില്‍ വലിച്ചെറിയുന്ന ആഹാരപദാര്‍ത്ഥങ്ങള്‍ ഫ്രിഡ്ജില്‍ വയ്ക്കാനാണ് ഞങ്ങള്‍ നിര്‍ദേശിക്കുന്നത്."
ഇസ ഫാത്തിമയുടെ ഈ പുതിയ ഉദ്യമത്തിനു വലിയ പിന്തുണയും പ്രോത്സാഹനവുമാണ് ലഭിച്ചുകൊണ്ടിരിക്കുന്നത്. വിദ്യാര്‍ത്ഥികളും വീട്ടുകാരും ഫ്രിഡ്ജില്‍ ഭക്ഷണം നിറയ്ക്കാന്‍ തയ്യാറായി വരുന്നു. വീടുകളിലും മറ്റും മിച്ചം വരുന്ന ഭക്ഷണം നശിപ്പിക്കാതെ ഇത്തരത്തില്‍ ഉപയോഗപ്പെടുത്തണമെന്നും എല്ലാ ജനവാസകേന്ദ്രങ്ങളോടനുബന്ധിച്ചും കമ്യൂണിറ്റി ഫ്രിഡ്ജ് എന്ന ആശയം വ്യാപകമാക്കണമെന്നും പലരും അഭിപ്രായപ്പെടുന്നുണ്ട്.