• താടിക്കാരന്‍

ഹായ് ഗയ്‌സ്!

ഉത്തര്‍പ്രദേശിലെ രാംകേവലിന്റെ കഥ കേട്ടിരുന്നോ? തന്റെ ഗ്രാമത്തില്‍, അതായത് നിസാംപൂരില്‍, ഇന്ത്യയ്ക്ക് സ്വാതന്ത്ര്യം കിട്ടിയതിനുശേഷം ആദ്യമായിട്ട് പത്താം ക്ലാസ് പാസായ ആളാണ് ഈ രാംകേവല്‍! ഒന്ന് ആലോചിച്ചു നോക്കിക്കേ, എഴുപത് കൊല്ലത്തിലേറെയായി ആരും ജയിക്കാത്ത ഒരു ഗ്രാമത്തില്‍ നിന്ന് ഒരു ചെക്കന്‍ ഫസ്റ്റ് അടിക്കുന്നു! പകല്‍ കൂലിപ്പണി, രാത്രി ഉറക്കമൊഴിച്ച് പഠിത്തം... എന്താല്ലേ! ശരിക്കും ഒരു റിയല്‍ ലൈഫ് 'മാസ്സ് ഹീറോ!' അവന്റെ ആത്മവിശ്വാസത്തിനും കഠിനാധ്വാനത്തിനും ഒരു ബിഗ് സല്യൂട്ട് !

അപ്പോ പഠിച്ച പണി പതിനെട്ടും നോക്കിയിട്ടും പൊട്ടുന്ന പാവങ്ങളുടെ കാര്യം എന്താണ് ഗയ്‌സ് ? പരീക്ഷയില്‍ മാര്‍ക്ക് കുറഞ്ഞാല്‍ അവരുടെ വീട്ടിലെ സീന്‍ എന്തായിരിക്കും? ചിലപ്പോള്‍ ചെറിയ 'പൊട്ടിത്തെറി', അല്ലെങ്കില്‍ മൊത്തത്തില്‍

ഒരു ശോകമൂക അന്തരീക്ഷം, അല്ലേ? എന്നാല്‍ കര്‍ണ്ണാടകയിലെ ബാഗല്‍ക്കോട്ടിലെ ഒരു ഫാമിലി 'വേറെ ലെവല്‍' ആണ് മക്കളേ! അവരുടെ മകന്‍ അഭിഷേകിന് പത്താം ക്ലാസ്സില്‍, 625-ല്‍ കിട്ടിയത് വെറും 200 (അതായത് ഒരു 32%). ആറ് സബ്‌ജെക്റ്റില്‍ ഒരെണ്ണത്തില്‍ പോലും കരകയറിയില്ല പാവം!

പക്ഷേ, ഇവിടെയാണ് ട്വിസ്റ്റ്! വീട്ടുകാര്‍ അവനെ വഴക്കു പറയുന്നതിനു പകരം ഒരു കിടിലന്‍ പാര്‍ട്ടി അങ്ങ് നടത്തിക്കളഞ്ഞു! അതും ചുമ്മാ പാര്‍ട്ടിയല്ല, '32%' എന്ന് വല്യ അക്ഷരത്തില്‍ എഴുതിയ കേക്ക് ഒക്കെ മുറിച്ച്, ഫുള്‍ പവറില്‍! 'മാര്‍ക്കല്ല മോനേ, നിന്റെ ശ്രമമാണ് വലുത്, അടുത്ത ചാന്‍സില്‍ പൊളിക്കാം' എന്ന കൂള്‍ മെസ്സേജ്! ഇതുകേട്ട് അഭിഷേകും ഫുള്‍ ഹാപ്പി, 'ഞാന്‍ തോറ്റെങ്കിലും എന്റെ കുടുംബം എന്നെ സൈഡ് ആക്കിയില്ല! അടുത്ത തവണ ഞാന്‍ പാസായി കാണിക്കും, ലൈഫില്‍ സെറ്റാകും' എന്ന് പയ്യന്റെ ഡയലോഗ്.

അപ്പൊ, തോല്‍വി ഒരു ഫുള്‍സ്‌റ്റോപ്പല്ല, ഒരു അടിപൊളി കോമ ഇട്ട് അടുത്ത ലെവലിലേക്ക് പോകാനുള്ള ഒരു ചാന്‍സ് ആണെന്ന് തെളിയിച്ച ഈ 'mass' ഫാമിലിക്ക് ഒരു ബിഗ് സല്യൂട്ട്! ഇങ്ങനെയൊക്കെ വേണ്ടേ പേരന്‍സ്!

ഓര്‍മ്മ വരുന്നത് പഴയ ഒരു സംഭവമാണ്.

പത്രോസ് മച്ചാനും ഗ്യാങ്ങും 'ഇനി പഴയ പണി തന്നെ ശരണം' എന്നു പറഞ്ഞ് വലയുമായി തിബേരിയാസ് കടലിലേക്ക് ഒരു 'യുടേണ്‍' അടിച്ചില്ലേ, ഏകദേശം 'എല്ലാം തീര്‍ന്നു ബ്രോ' മൂഡില്‍!

അപ്പൊ ഒരു സൈഡില്‍, കടപ്പുറത്ത് നമ്മുടെ സ്വന്തം ജീസസ്, ഒരു സര്‍പ്രൈസ് ഫിഷ് ഫ്രൈ പാര്‍ട്ടിയൊക്കെ സെറ്റാക്കി, 'വാ മക്കളേ, സീന്‍ കൂളാക്കാം, ഫുഡ് റെഡി!' എന്ന ഭാവത്തില്‍ ചില്ലായി വെയിറ്റിംഗ്!

ഒന്ന് ആലോചിച്ചു നോക്കിക്കേ, ആ ഒരു 'വെല്‍ക്കം ബാക്ക്' കം ബാര്‍ബിക്യൂ കണ്ടപ്പോള്‍ ശിഷ്യന്മാരുടെ കിളി പോയിട്ടുണ്ടാകും. ലൈഫിന് ഒരു കിടു റീസ്റ്റാര്‍ട്ട് ബട്ടണ്‍ കിട്ടിയ പോലായിക്കാണും!

അപ്പൊ, സംഭവം സിമ്പിളാണ്! രാംകേവലിന്റെ ചരിത്ര വിജയമായാലും, അഭിഷേകിന്റെ 'ഫെയിലിയര്‍' പാര്‍ട്ടിയായാലും, പത്രോസിന് കിട്ടിയ ആ സ്‌നേഹപൂര്‍ണ്ണമായ സ്വീകരണമായാലും എല്ലായിടത്തും നമ്മള്‍ കാണുന്നത് ഒരേയൊരു കാര്യമാണ്: കട്ട സപ്പോര്‍ട്ട്! ഈ സ്‌നേഹവും പ്രോത്സാഹനവുമാണ് ലൈഫിലെ യഥാര്‍ഥ 'ടോപ്പര്‍' മൊമന്റ്. ഒരാളുടെ വിജയം ഒരു നാടിന് മുഴുവന്‍ പ്രകാശമാകുമ്പോള്‍, മറ്റൊരാളുടെ 'ഫെയിലിയര്‍ പാര്‍ട്ടി' പരിശ്രമത്തിന് മാര്‍ക്കിനേക്കാള്‍ വിലയുണ്ടെന്ന് ലോകത്തോട് പറയുന്നു!

വിജയമായാലും, ഒരു 'സെക്കന്‍ഡ് ചാന്‍സ്' ആയാലും, കൂടെ നില്‍ക്കാന്‍ ആളുണ്ടെങ്കില്‍ പിന്നെന്തു വേണം, അല്ലേ? ഈ രണ്ടു പിള്ളേരും, രണ്ടുതരം ഫാമിലീസും ശരിക്കും പൊളിയാണ്! എന്താ നിങ്ങളുടെ അഭിപ്രായം?