മുഴുവന്‍ പേര് പുബ്ലിയൂസ് സുള്‍പിച്ചിയൂസ് ക്വിരിനിയൂസ് എന്നാണ് (ജീവിതകാലം ഏതാണ്ട് BC 91 മുതല്‍ AD 12 വരെ). റോമന്‍ കുലീനനാണ്. സിറിയയുടെ ഗവര്‍ണറായിരുന്നു (AD 12 വരെ). അന്ന് യൂദയായുടെ മേല്‍ അദ്ദേഹത്തിന് നാമമാത്രമായ അധികാരമുണ്ടായിരുന്നു. AD 12-ല്‍ അദ്ദേഹം റോമിലേക്കു തിരിച്ചുപോയി. തിബേരിയൂസ് ചക്രവര്‍ത്തിയുടെ ഉറ്റ സഹപ്രവര്‍ത്തകനായി ജീവിച്ചു. ക്വിരിനിയൂസ് സിറിയായുടെ ഗവര്‍ണറായിരിക്കുമ്പോള്‍ അഗസ്റ്റസ് സീസര്‍ കനേഷുമാരി കണക്കെടുക്കാനുള്ള കല്പന പുറപ്പെടുവിച്ചെന്നും അതു നടപ്പാക്കിയ കാലത്ത് യേശു ജനിച്ചുവെന്നും ലൂക്കായുടെ സുവിശേഷത്തില്‍ പറയുന്നുണ്ട് (ലൂക്കാ 2:2). മത്തായിയും ലൂക്കായും യേശുവിന്‍റെ ജനനത്തീയതി മഹാനായ ഹേറോദേസിന്‍റെ കാലവുമായി ബന്ധിപ്പിച്ചാണു പറയുന്നത്. കനേഷുകുമാരിക്കണക്ക് AD 6- ലോ 7-ലോ ആണു നടന്നത്. അന്നു മഹാനായ ഹേറോദേശ് മരിച്ചിട്ട് പത്തുവര്‍ഷം കഴിഞ്ഞിരുന്നു.