Kerala
ഫാ. ഡോ. ആന്‍റണി കൊഴുവനാല്‍ മോണ്‍സിഞ്ഞോര്‍
താമരശ്ശേരി: താമരശ്ശേരി രൂപതാ വൈദികനായ ഫാ. ഡോ. ആന്‍റണി കൊഴുവനാലിനെ ഫ്രാന്‍സിസ് മാര്‍പാപ്പ മോണ്‍സിഞ്ഞോര്‍ പദവിലേക്ക് ഉയര്‍ത്തി. 'ചാപ്ലയിന്‍ ഓഫ് ഹിസ് ഹോളിനസ്സ്' എന്ന പദവിയാണ് ഫാ. ആന്‍റണി കൊഴുവനാലിന് ലഭിച്ചിരിക്കുന്നത്. താമരശ്ശേരി രൂപതയുടെ ഉന്നത വിദ്യാഭ്യാസ സ്ഥാപനമായ സ്റ്റാര്‍ട്ടിന്‍റെ ഡയറക്ടറായി സേവനമനുഷ്ഠിച്ചുവരികെയാണ് ഫാ. ആന്‍റണി കൊഴുവനാലിന് മോണ്‍സിഞ്ഞോര്‍ പദവി ലഭിക്കുന്നത്. രൂപതയുടെ ആലോചനാസമിതിയംഗം കൂടിയാണ് ഫാ. ആന്‍റണി കൊഴുവനാല്‍. വിദ്യാഭ്യാസ, സാമൂഹിക, കാര്‍ഷിക, സാംസ്കാരിക രംഗങ്ങളില്‍ മൂന്നു പതിറ്റാണ്ടുകളില്‍ അധികം ചെയ്ത സേവനങ്ങള്‍ക്കുള്ള അംഗീകാരമായാണ് ഈ പദവി കൊഴുവനാലച്ചനെ തേടിയെത്തുന്നത്.
