2026-ലെ കാത്തലിക് മീഡിയ അസോസിയേഷൻ (CMA) അവാർഡുകളിൽ കെയ്റോസ് ഗ്ലോബൽ വീണ്ടും ശ്രദ്ധേയമായ അംഗീകാരം നേടി. പ്രാർത്ഥനയും ആത്മീയതയും വിഭാഗത്തിൽ *മാഗസിൻ ഓഫ് ദ ഇയർ* പുരസ്കാരത്തിൽ തുടർച്ചയായ രണ്ടാം വർഷവും *രണ്ടാം സ്ഥാനം* സ്വന്തമാക്കി. കൂടാതെ, വിശുദ്ധരുടെ ജീവിതം ആകർഷകവും ഹൃദയസ്പർശിയുമായ രീതിയിൽ അവതരിപ്പിക്കുന്ന ജനപ്രിയ പംക്തിയായ ചാൻ്റിലിയേഴ്സിനു മികച്ച സ്ഥിരം കോളം വിഭാഗത്തിൽ രണ്ടാം സ്ഥാനവും ലഭിച്ചു.
അമേരിക്ക ആസ്ഥാനമായി പ്രവർത്തിക്കുന്ന ആഗോള പ്രശസ്ത കത്തോലിക്ക മാധ്യമ സംഘടനയായ കാത്തലിക് മീഡിയ അസോസിയേഷനിൽ നിന്ന് കെയ്റോസ് ഗ്ലോബലിന് ലഭിക്കുന്ന തുടർച്ചയായ നാലാമത്തെ അംഗീകാരമാണിത്.
2018-ൽ പ്രസിദ്ധീകരണം ആരംഭിച്ച കൈറോസ് ഗ്ലോബൽ, അതിന്റെ 100-ാം പതിപ്പ് ഈ ജൂലൈയിൽ പ്രത്യേക സ്മാരക പതിപ്പായി പുറത്തിറക്കി.
ജീസസ് യൂത്തിന്റെ മാധ്യമ ശുശ്രൂഷയായ കെയ്റോസ് മീഡിയ പ്രസിദ്ധീകരിക്കുന്ന കെയ്റോസ് ഗ്ലോബൽ, പ്രചോദനാത്മകവും വിശ്വാസം നിറഞ്ഞതുമായ ഉള്ളടക്കം, സമകാലിക ഡിസൈൻ, ഇന്നത്തെ യുവജനങ്ങളുടെയും യുവകുടുംബങ്ങളുടെയും ചോദ്യങ്ങൾക്കും വെല്ലുവിളികൾക്കും പ്രത്യാശകൾക്കും ഇടയിൽ യേശുവിനെ പരിചയപ്പെടുത്താനുള്ള പ്രതിബദ്ധത എന്നിവകൊണ്ട് ശ്രദ്ധേയമാണ്.
നാലു പതിറ്റാണ്ടുകൾക്ക് മുമ്പ് ഇന്ത്യയിൽ ആരംഭിച്ച, സഭയുടെ ഔദ്യോഗിക അംഗീകാരം ലഭിച്ച അന്താരാഷ്ട്ര അൽമായ യുവജന പ്രസ്ഥാനമായ ജീസസ് യൂത്ത്, ഇന്ന് ഏഷ്യ, ആഫ്രിക്ക, യൂറോപ്പ്, ഓസ്ട്രേലിയ, വടക്കേ അമേരിക്ക, തെക്കേ അമേരിക്ക എന്നിവിടങ്ങളിലായി 40-ലധികം രാജ്യങ്ങളിൽ സജീവ സാന്നിധ്യമുണ്ട്.
കെയ്റോസ് മീഡിയ ഇംഗ്ലീഷ്, ഹിന്ദി, മലയാളം എന്നീ മൂന്ന് ഭാഷകളിലായി നാല് മാസികകൾ പ്രസിദ്ധീകരിക്കുന്നു. കെയ്റോസ് ഗ്ലോബലിനൊപ്പം കെയ്റോസ് ബഡ്സ് ഇംഗ്ലീഷിലും ഹിന്ദിയിലും പ്രസിദ്ധീകരിക്കുന്നതോടൊപ്പം കൊച്ചി, ഡൽഹി, മിഡിൽ ഈസ്റ്റ്, യുണൈറ്റഡ് കിംഗ്ഡം എന്നിവിടങ്ങളിൽ നിന്നാണ് അച്ചടിക്കുന്നത്.
ജീസസ് യൂത്തിൻ്റെ എക്ളേസ്റ്റിയാസ്റ്റിക്കൽ അഡ്വൈസർ ബിഷപ്പ് ഡോ. അലക്സ് വടക്കും തല കെയ്റോസിന് തുടർച്ചയായി ലഭിക്കുന്ന നേട്ടത്തിൽ സന്തോഷം പ്രകടിപ്പിക്കുകയും കെയ്റോസ് പ്രവർത്തകരെ അനു മോദിക്കുകയും ചെയ്തു.
പുരസ്കാരം നേടിയ പതിപ്പ് പ്രസിദ്ധീകരിച്ച സമയത്ത് ഡോ. ചാക്കോച്ചൻ ഞാവള്ളിൽ കെയ്റോസ് ഗ്ലോബലിന്റെ എഡിറ്റർ-ഇൻ-ചീഫ് ആയിരുന്നു. ഇപ്പോൾ അദ്ദേഹം കെയ്റോസ് മീഡിയയുടെ ഡയറക്ടറായി സേവനം അനുഷ്ഠിക്കുന്നു. അദ്ദേഹത്തെ തുടർന്ന് സിജോ തോമസ് കെയ്റോസ് ഗ്ലോബലിന്റെ പുതിയ എഡിറ്റർ-ഇൻ-ചീഫ് ആയി ചുമതലയേറ്റു.