താമസസ്ഥലമായ സാന്താ മാര്‍ത്തായില്‍ തന്നോടൊപ്പം ഉച്ചഭക്ഷണം കഴിക്കാന്‍ ഫ്രാന്‍ സിസ് മാര്‍പാപ്പ 21 സിറിയന്‍ അഭയാര്‍ത്ഥികളെ ക്ഷണിച്ചു വരുത്തി. അതിഥികളിലെ കുട്ടികള്‍ക്ക് പാപ്പ സമ്മാനങ്ങളും കൈമാറി. ഗ്രീസ് സന്ദര്‍ശിച്ചു മടങ്ങുമ്പോള്‍ കഴിഞ്ഞ ഏപ്രിലില്‍ മാര്‍പാപ്പ തന്റെ വിമാനത്തില്‍ കയറ്റി കൊണ്ടുവന്നവരാണ് ഈ അഭയാര്‍ത്ഥികളില്‍ ഒരു സംഘം. രണ്ടാമത്തെ കൂട്ടര്‍ അതിനെ തുടര്‍ന്നു കഴിഞ്ഞ ജൂണില്‍ റോമിലെത്തി. ഇറ്റലിയിലെ തങ്ങളുടെ ജീവിതാരംഭത്തെക്കുറിച്ച് കുട്ടികളും മുതിര്‍ന്നവരും ആഹാരത്തിനിടയില്‍ പാപ്പയോടു സംസാരിച്ചു.
മാര്‍പാപ്പയുടെ വിമാനത്തില്‍ വന്നത് മൂന്നു മുസ്ലീം കുടുംബങ്ങളാണ്. 6 കുട്ടികളടക്കം 12 പേരായിരുന്നു അവര്‍. ഇപ്പോള്‍ ഇസ്ലാമിക് സ്റ്റേറ്റിന്റെ നിയന്ത്രണത്തിലുള്ള പ്രദേശത്തായിരുന്നു അവരുടെ വീടുകള്‍. അവ തകര്‍ക്കപ്പെട്ടു. ജൂണില്‍ റോമിലെത്തിയ രണ്ടാമത്തെ സംഘത്തില്‍ മൂന്നു കുട്ടികളടക്കം 9 പേരാണുള്ളത്. ഇവരില്‍ രണ്ടു പേര്‍ ക്രൈസ്തവരാണ്. സാന്ത് എഗിദിയോ എന്ന അല്മായ ഭക്തസംഘടനയാണ് ഇപ്പോള്‍ ഈ അഭയാര്‍ ത്ഥികള്‍ക്കു സംരക്ഷണം നല്‍കി വരുന്നത്.