ലണ്ടൻ: കഴിഞ്ഞ ആഴ്ച നടന്ന യു കെ പ്രാദേശിക തെരഞ്ഞെടുപ്പിൽ ഹാംഷയർ കൗണ്ടിയിലെ ഏക ലേബർ പാർട്ടി കൗൺസിലറായി ജയിച്ച സജീഷ് ടോം, ബേസിംഗ്‌സ്‌റ്റോക്ക് ബറോ കൗൺസിലിന്റെ പുതിയ ഡെപ്യൂട്ടി മേയറായി ചുമതല ഏറ്റു.

ഒരേ സമയം കൗണ്ടി കൗൺസിലിലും ബറോ കൗൺസിലിലും അംഗമാകുക എന്നത് തന്നെ വിരളമാണെന്നിരിക്കെ, അതിനൊപ്പം ഒരു ബറോയുടെ ഡെപ്യൂട്ടി മേയർകൂടി ആവുക എന്നത് യു കെ രാഷ്ട്രീയത്തിൽ തന്നെ അപൂർവ്വമാണ്. ഈ നേട്ടമാണ് പ്രവാസി സമൂഹത്തിനാകെ അഭിമാനം പകർന്ന് സജീഷ് ടോം കൈവരിച്ചിരിക്കുന്നത്.

2021 മുതൽ ബേസിംഗ്‌സ്‌റ്റോക്ക് ബറോ കൗൺസിലിലെ പോപ്പിലി വാർഡിനെ പ്രതിനിധീകരിക്കുന്ന സജീഷ് ടോം ഓരോ തെരഞ്ഞെടുപ്പുകളിലും മികച്ച ഭൂരിപക്ഷത്തോടെ വിജയിക്കുന്ന കൗൺസിലർമാരിൽ ഒരാളാണ്. ഈ വർഷം വിജയിച്ച ഹാംഷയർ കൗണ്ടിയിലേക്കുള്ള ബേസിംഗ്‌സ്‌റ്റോക്ക് നോർത്ത് ഡിവിഷൻ പരമ്പരാഗതമായി ലേബർ പാർട്ടി നിലനിർത്തിപോരുന്ന ഒരു ഡിവിഷൻ ആണെങ്കിലും, തീവ്ര വലതുപക്ഷ പാർട്ടിയായ "റീഫോം യു കെ" യുടെ കുത്തൊഴുക്കിൽ വിജയ സാധ്യത ഇല്ലെന്ന് ലേബർപാർട്ടി പോലും വിധിയെഴുതിയ ഒന്നായിരുന്നു.

യു കെ രാഷ്ട്രീയ ചരിത്രത്തിൽ വളരെ ചുരുക്കം മലയാളികൾ മാത്രമേ ഡെപ്യൂട്ടി മേയർ, മേയർ പദവികളിൽ എത്തിയിട്ടുള്ളൂ. ഓമന ഗംഗാധരൻ, ഫിലിപ്പ് എബ്രഹാം, മഞ്ജു ഷാഹുൽ ഹമീദ്, ടോം ആദിത്യ, ബൈജു തിട്ടാല തുടങ്ങിയ ഈ മലയാളികളുടെ നിരയിലേക്ക് സജീഷ് ടോമിന്റെ പേരുകൂടി എഴുതി ചേർക്കപ്പെടുകയാണ്. യു കെ യിലെ മേയറൽ പ്രോട്ടോകോൾ അനുസരിച്ച് അടുത്ത വർഷം മേയിൽ സജീഷ് ടോം മേയർ പദവിയിലേക്ക് തെരഞ്ഞെടുക്കപ്പെടും.

കോട്ടയം ജില്ലയിൽ വൈക്കം, ചെമ്പ് അയ്യനംപറമ്പിൽ കുടുംബാംഗമായ സജീഷിൻറെ കുടുംബം ഇപ്പോൾ എറണാകുളം ജില്ലയിൽ ഉദയംപേരൂർ ഗ്രാമപഞ്ചായത്ത് അതിർത്തിയിലുള്ള തെക്കൻ പറവൂരിലാണ്. സജീഷിന്റെ ഭാര്യ ആൻസി ഹാംഷയർ ഹോസ്പിറ്റൽസ് എൻ എച്ച് എസ് ഫൗണ്ടേഷൻ ട്രസ്റ്റിൽ ഐ സി യു ഡിപ്പാർട്ട്മെൻറ്റിൽ ഡെപ്യൂട്ടി സിസ്റ്ററായി ജോലി ചെയ്യുന്നു. ഏക മകൾ അലീന ലണ്ടണിൽ ജോലി ചെയ്യുന്നു.

2015, 2016 വർഷങ്ങളിൽ യു കെ യിലെ മലയാളി അസോസിയേഷനുകളുടെ ദേശീയ സംഘടനയായ "യുക്മ"യുടെ ദേശീയ ജനറൽ സെക്രട്ടറിയായി പ്രവർത്തിച്ച സജീഷ് ടോം, തുടർന്നുള്ള നാല് വർഷങ്ങൾ സംഘടനയുടെ ദേശീയ പബ്ലിക് റിലേഷൻ ഓഫീസർ ആയും പ്രവർത്തിച്ചിട്ടുണ്ട്. യു കെ പൊതുസമൂഹത്തിൽ രണ്ട് ദശാബ്ദത്തിലേറെയായി സജീവസാന്നിധ്യമായ സജീഷ്, തുടർച്ചയായ മൂന്ന് ടേമുകളിൽ ബേസിംഗ്‌സ്‌റ്റോക്ക് മൾട്ടികൾച്ചറൽ ഫോറം ട്രഷറർ എന്ന നിലയിൽ ഏറെ ശ്രദ്ധേയമായ പ്രവർത്തനത്തിന് നേതൃത്വം നൽകുകയും 2012 ൽ "മേയേർസ് വോളൻറ്ററി അവാർഡ്" കരസ്ഥമാക്കുകയും ചെയ്തിട്ടുണ്ട്.

ബേസിംഗ്‌സ്‌റ്റോക്ക് എൻ എച്ച് എസ് ഹോസ്പിറ്റലിൽ അഡ്മിൻ വിഭാഗത്തിൽ ജോലിചെയ്യുന്ന സജീഷ് ടോം തൊഴിലാളി പ്രസ്ഥാനങ്ങളിലും സജീവമാണ്. യു കെ യിലെ പ്രബല തൊഴിലാളി യൂണിയനായ UNISON ന്റെ ബ്രാഞ്ച് ചെയർപേഴ്സൺ, ലേബർലിങ്ക് ഓഫീസർ, സൗത്ത് ഈസ്റ്റ് റീജിയണൽ ഫിനാൻസ് കമ്മറ്റി അംഗം, റീജിയണൽ വെൽഫെയർ കമ്മറ്റി അംഗം തുടങ്ങി നിരവധി ചുമതലകൾ വിവിധ കാലഘട്ടങ്ങളിലായി സജീഷ് വഹിച്ചിട്ടുണ്ട്.

സി എൽ സി എറണാകുളം-അങ്കമാലി അതിരൂപത മുൻ പ്രസിഡണ്ടും ഇടവകയിൽ വിശ്വാസ പരിശീലകനും ആയിരുന്നു.