പാരീസ് ഒളിമ്പിക്‌സിനുവേണ്ടി സംഘാടകര്‍ നിര്‍മ്മിച്ച മണി ലോകത്തിലെ ഏറ്റവും ചരിത്ര പ്രധാനമായ കത്തീഡ്രലുകളിലൊന്നായ ഫ്രാന്‍സിലെ നോത്രദാം കത്തീഡ്രലിനു സമ്മാനിച്ചു. ഇനി കത്തീഡ്രലിലെ എല്ലാ ദിവ്യബലികളിലും ഈ മണി മുഴങ്ങും.
ഒളിമ്പിക് സംഘാടകസമിതി ഈ വാഗ്ദാനവുമായി സമീപിച്ചപ്പോള്‍ തങ്ങള്‍ സന്തോഷപൂര്‍വം സമ്മതിക്കുകയായിരുന്നു എന്ന് കത്തീഡ്രല്‍ വികാരി ഫാ. ഒളിവിയര്‍ ഡുമാസ് പറഞ്ഞു. കത്തീഡ്രലിന്റെ ഉള്ളിലായിരിക്കും മണി സ്ഥാപിക്കുക.
നോത്രദാം കത്തീഡ്രലിലെ ഏറ്റവും വലിയ മണി പതിനേഴാം നൂറ്റാണ്ടില്‍ സ്ഥാപിക്കപ്പെട്ടതാണ്. ലോകമഹായുദ്ധങ്ങള്‍ അവസാനിച്ചപ്പോള്‍ ഈ മണി മുഴങ്ങുകയും, സമാധാനത്തിന്റെ ആ മണിനാദങ്ങള്‍ ചരിത്രത്തില്‍ ഇടം പിടിക്കുകയും ചെയ്തിട്ടുണ്ട്. 2019 ലെ അഗ്‌നിബാധയിലും ആ മണി സംരക്ഷിക്കപ്പെട്ടു.