കോവിഡ് പകര്‍ച്ചവ്യാധി ഏറ്റവും രൂക്ഷമായി ബാധിച്ച വടക്കന്‍ ഇറ്റലിയിലെ ലൊംബാര്‍ദി മേഖലയില്‍ സേവനരംഗത്തുണ്ടായിരുന്ന ഡോക്ടര്‍മാര്‍ക്കും ആരോഗ്യപ്രവര്‍ത്തകര്‍ക്കും ഫ്രാന്‍സിസ് മാര്‍പാപ്പ കൂടിക്കാഴ്ച അനുവദിച്ചു. ലോക്ക്ഡൗണിനു ശേഷം സന്ദര്‍ശകരെ സ്വീകരിക്കാന്‍ തുടങ്ങിയ മാര്‍പാപ്പ ആദ്യം കണ്ട സംഘങ്ങളിലൊന്നാണിത്. ലൊംബാര്‍ദി മേഖലാ ഭരണകൂടത്തിന്റെ പ്രസിഡന്റും മിലാന്‍ ആര്‍ച്ചുബിഷപും നിരവധി മെത്രാന്മാരും സംഘത്തിനൊപ്പം ഉണ്ടായിരുന്നു. നിസ്തുലമായ സേവനം ജനങ്ങള്‍ക്കു നല്‍കിയതിനു പാപ്പാ ആരോഗ്യപ്രവര്‍ത്തകര്‍ക്കു നന്ദി പറഞ്ഞു. മനുഷ്യത്വത്തിന്റെ ദൃശ്യമായ അടയാളമായിരുന്നു കോവിഡ് കാലത്ത് ആരോഗ്യപ്രവര്‍ത്തകരെന്നും രോഗികള്‍ അവരെ തങ്ങള്‍ക്കരികിലെത്തിയ മാലാഖമാരായാണു കണ്ടതെന്നും മാര്‍പാപ്പ പറഞ്ഞു.