നിനക്ക് എന്റെ കൃപ മതി (2 കോറിന്തോസ് 12:9). ഇതാണ് ഞാന്‍ മോട്ടോ ആയി എടുത്തിരിക്കുന്നത്. കാരണം, ജീവിതത്തിന്റെ നിര്‍ണ്ണായകമായ തീരുമാനങ്ങളിലൊക്കെയും എനിക്കു ധൈര്യം പകര്‍ന്നിട്ടുള്ള ഒരു വചനഭാഗമാണ് ഇത്. അതെന്നെ ഒത്തിരിയേറെ ശക്തിപ്പെടുത്തിയിട്ടുള്ളതാണ്.

ഏഴാം ക്ലാസ് മുതല്‍ എന്നും മുടങ്ങാതെ പള്ളിയില്‍ പോകുമായിരുന്നു. പത്താം ക്ലാസ് ആയപ്പോള്‍ അച്ചനാകാനുള്ള ആഗ്രഹം എന്റെ അധ്യാപികയായിരുന്ന സിസ്റ്റര്‍ ലീനയോടു പറഞ്ഞു. തിരുഹൃദയ സന്യാസിനീ സമൂഹത്തിലെ അംഗമായിരുന്നു സി. ലീന എസ് എച്ചാണ് എന്റെ ദൈവവിളിയെ പ്രോത്സാഹിപ്പിക്കുകയും സി എം ഐ സന്യാസസമൂഹത്തെ പരിചയപ്പെടുത്തുകയും ചെയ്തത്.

ഒരു സംശയവുമില്ല. ഞങ്ങളുടെ സമൂഹജീവിതമാണത്. അതാണെന്നെ ഏറ്റവും ആകര്‍ഷിച്ചിട്ടുള്ളത്. ചാവറപ്പിതാവിന്റെ ഒരു പ്രധാനപ്പെട്ട ആശയമാണ് കൂടെപ്പിറപ്പുകളുടെ സ്‌നേഹവും ഐക്യവും കഠിനാധ്വാനവും. അതു ഞങ്ങളെ വളരെയേറെ സഹായിക്കുന്നുണ്ട്. കൂടപ്പിറപ്പുകളെന്ന തോന്നലും അനുഭവവും സ്‌നേഹവും ഐക്യവും പ്രാര്‍ത്ഥനയും അതില്‍ നിന്നുണ്ടാകുന്ന കഠിനാധ്വാനവും. അതു വളരെയേറെ പ്രയോജനപ്രദമാണ്.

ചാവറയച്ചന്റേത് ബൈബിളധിഷ്ഠിത കാഴ്ചപ്പാടാണ്. പ്രാര്‍ത്ഥനയും അതില്‍ നിന്നുളവാകുന്ന പ്രവര്‍ത്തനവും. പ്രാര്‍ത്ഥനയും പ്രവര്‍ത്തനവും ഒരുമിച്ചുകൊണ്ടുപോകുമ്പോഴാണ് അതു വലിയ വിജയത്തിനു കാരണമാകുന്നത്. സി എം ഐ സഭയുടെ സ്ഥാപനങ്ങളും മിഷന്‍ പ്രവര്‍ത്തനങ്ങളും ഒക്കെ പ്രാര്‍ത്ഥനയുമായി സമന്വയിപ്പിക്കുന്നതിനാലാണ് വലിയ വിജയമാകുന്നത്. അവയൊന്നും ഒരിക്കലും പരാജയപ്പെടുന്നതു കണ്ടിട്ടില്ല. അതുകൊണ്ട് ദൈവത്തോടു പ്രാര്‍ത്ഥിക്കുക, ദൈവം നമ്മോടാവശ്യപ്പെടുന്നതു ചെയ്യുക, അതു നമ്മെ വിജയത്തിലേക്കു നയിക്കും.

പ്രവാസികള്‍ എപ്പോഴും ദൈവത്തോടും ദേവാലയത്തോടും ചേര്‍ന്നു നില്‍ക്കുന്നതായി തോന്നിയിട്ടുണ്ട്. അവര്‍ എല്ലാ ഞായറാഴ്ചകളിലും കുഞ്ഞുങ്ങളോടൊപ്പം ദേവാലയത്തിലേക്കു വരികയും വിശുദ്ധ കുര്‍ബാനയില്‍ സംബന്ധിക്കുകയും കുഞ്ഞുങ്ങളെ വളരെ നിഷ്ഠയോടുകൂടി മതബോധനത്തിനു കൊണ്ടു വരികയും ചെയ്യുന്നു. ഇത് അതതു നാടുകളിലെ തദ്ദേശീയരായ ആളുകളെ വളരെയധികം സ്പര്‍ശിക്കുന്നതായി കണ്ടിട്ടുണ്ട്. അവര്‍ നമ്മുടെ ആരാധനാരീതിയും ജീവിതരീതിയും കുടുംബങ്ങള്‍ തമ്മിലുള്ള അടുപ്പവുമെല്ലാം ശ്രദ്ധിക്കുന്നുണ്ട്, അതവരെ സ്വാധീനിക്കുന്നുണ്ട്.

പ്രവാസികള്‍ നേരിടുന്ന ഒരു പ്രധാന വെല്ലുവിളി തീര്‍ച്ചയായും മതനിരാസപരമായ (സെക്കുലര്‍) ഒരു കാഴ്ചപ്പാട് എല്ലായിടത്തും ശക്തി പ്രാപിക്കുന്നു എന്നതു തന്നെയാണ്. പുതിയ തലമുറയെ ഇത് ഒരു പരിധിവരെ സ്വാധീനിക്കുന്നുണ്ട്. അതൊരു വെല്ലുവിളി തന്നെയാണ്.

വളരെ അപ്രതീക്ഷിതമായ ഒരു നിയോഗമാണിത്. പക്ഷേ നമ്മുടെ സ്വപ്‌നങ്ങള്‍ക്കോ പദ്ധതികള്‍ക്കോ വലിയ സ്ഥാനമില്ല. ഇത് ദൈവത്തിന്റെ പദ്ധതിയാണെന്ന് ആത്യന്തികമായി കരുതുന്നു, അതിനു വിധേയപ്പെടുന്നു.

അഞ്ചു വര്‍ഷത്തിനിടെ ഞാന്‍ ശ്രദ്ധിച്ച ഒരു കാര്യം മെല്‍ബണിലെ സീറോ മലബാര്‍ സഭ വളരെ യൗവനം നിറഞ്ഞതും സജീവവുമാണ്. ഒത്തിരിയേറെ യുവാക്കള്‍ ഇവിടെയുണ്ട്. പള്ളിയോടും ദൈവത്തോടും ചേര്‍ന്നുനില്‍ക്കാനുള്ള ആഗ്രഹം അവര്‍ക്കു കൈമുതലാണ്. ആ മാതൃക ഈ നാട്ടിലെ സഭയില്‍ ഒരുപാടു മാറ്റങ്ങള്‍ ഉണ്ടാക്കിയേക്കാം. അതിന് ഏറ്റവും വേണ്ടത് നാം ഒറ്റക്കെട്ടായി നില്‍ക്കുക എന്നതാണ്. അതു സാധിക്കും എന്നു ഞാന്‍ പ്രതീക്ഷിക്കുന്നു.

ദൈവനിയോഗത്തിന്റെ ഭാഗമാണിത്. തദ്ദേശീയസഭ തളരുമ്പോഴും അതിനെ താങ്ങിനിറുത്താനും വളര്‍ത്താനുമുള്ള വലിയ കാര്യമാണ് നാമിപ്പോള്‍ അവിടെ ചെയ്തുകൊണ്ടിരിക്കുന്നത്. സീറോ മലബാര്‍ സഭ മാത്രമല്ല, ഏഷ്യയില്‍ നിന്നുള്ള പല സഭകളും ഇതു തന്നെ ചെയ്യുന്നു. അതുപോലെ ആഫ്രിക്കയില്‍ നിന്നുള്ള കുടിയേറ്റജനതയും. അവരുടെ തീക്ഷ്ണമായ പ്രാര്‍ത്ഥനയും ആരാധനാജീവിതവും തദ്ദേശീയസഭയെ വളര്‍ത്താന്‍ സഹായകരമാകുന്നുണ്ട്.

പുതിയ തലമുറ വിശ്വാസകാര്യങ്ങളില്‍ വലിയ താത്പര്യം കാണിക്കുന്നതായാണു ഞാന്‍ കാണുന്നത്. കാരണം മാതാപിതാക്കള്‍ അവരെ പഠിപ്പിക്കാനും വിശ്വാസത്തില്‍ വളര്‍ത്താനും വലിയ താത്പര്യം കാണിക്കുന്നുണ്ട്. നേരത്തെ സൂചിപ്പിച്ചതു പോലെ സെക്കുലര്‍ സംസ്‌കാരം എല്ലാവരേയും സ്വാധീനിക്കുന്നുണ്ടെങ്കിലും പുതിയ തലമുറ അതിനെ മറികടക്കുന്നുണ്ട്. പ്രവാസിസഭകള്‍ക്കു മികച്ച ഭാവിയുണ്ടെന്നു തന്നെയാണു ഞാന്‍ കരുതുന്നത്.

ഇവിടത്തെ പുതിയ തലമുറയില്‍ നിന്നു ദൈവവിളികള്‍ രൂപപ്പെട്ടു വരുന്നുണ്ട്. രണ്ടുമൂന്നു പേര്‍ ഇപ്പോള്‍ തന്നെയുണ്ട്. അതൊരു വലിയ കാര്യമാണ്. ഭാവിയില്‍ കൂടുതലുണ്ടാകുമെന്നു ഞാന്‍ വിശ്വസിക്കുന്നു.