ഫാ. ഡോ. മാര്‍ട്ടിന്‍ ശങ്കൂരിക്കല്‍
വത്തിക്കാന്‍: വര്‍ഷങ്ങള്‍ക്കു മുമ്പ് മാര്‍ട്ടിന്‍ ഡി പോറസ് എന്ന വിശുദ്ധന്‍ മരിച്ചപ്പോള്‍ ലിമാ നഗരത്തിലെ പാവപ്പെട്ടവര്‍ പറഞ്ഞു: 'ഞങ്ങള്‍ക്ക് ഞങ്ങളുടെ പിതാവിനെ നഷ്ടപ്പെട്ടു.'
ഫ്രാന്‍സിസ് പാപ്പ നിത്യതയിലേക്കു പോയപ്പോള്‍ വത്തിക്കാന്‍ പരിസരത്ത് അന്തിയുറങ്ങുന്ന പാവപ്പെട്ട അഭയാര്‍ഥികള്‍ പറഞ്ഞു: 'നന്ദി പാപ്പ, ഞങ്ങളെ മനുഷ്യോചിതമായി കണ്ടതിന്.'
ഒപ്പം വത്തിക്കാന്‍ സ്‌ക്വയറിന്റെ മുമ്പില്‍ അവര്‍ കിടക്കുന്ന തെരുവില്‍ പാപ്പായുടെ ചിത്രം പുഷ്പങ്ങളാല്‍ അലങ്കരിച്ചു. വത്തിക്കാനില്‍ അന്ത്യാഞ്ജലി അര്‍പ്പിക്കാനെത്തിയ ഭൂരിഭാഗം പേരും ഈ ആദരം കണ്ട് കണ്ണു നിറഞ്ഞവരാണ്.
വ്യത്യസ്തമായ ഒരു ആദരാഞ്ജലി!
2019-ലെ ലോക അഭയാര്‍ഥി ദിനത്തില്‍ ഫ്രാന്‍സിസ് പാപ്പാ വത്തിക്കാന്‍ സ്‌ക്വയറില്‍ അനാവരണം ചെയ്ത 'Angels Unaware' എന്ന ശില്‍പം വളരെ പ്രസിദ്ധമാണ്. കനേഡിയന്‍ ആര്‍ട്ടിസ്റ്റായ തിമോത്തി പി. ഷ്മാല്‍സ് രൂപകല്‍പന ചെയ്ത ഈ ശില്പത്തില്‍ 140 അഭയാര്‍ഥികളുണ്ട്.
നാസി ജര്‍മ്മനിയില്‍ നിന്ന് രക്ഷപെട്ട ജൂതവംശജന്‍ മുതല്‍ ആഭ്യന്തര യുദ്ധത്തില്‍ തകര്‍ന്ന സിറിയന്‍ അഭയാര്‍ഥി വരെ ഈ ശില്‍പത്തിലുണ്ട്. അറിയാതെ ദൈവദൂതരെ സല്‍ക്കരിച്ച് അനുഗ്രഹിക്കപ്പെട്ട അബ്രാഹത്തിന്റെ ഓര്‍മ്മ പേറുന്ന ശില്‍പം!
വത്തിക്കാനില്‍ അന്ത്യാഞ്ജലി അര്‍പ്പിക്കാനെത്തിയ പലരും ഈ ശില്‍പത്തിനു മുമ്പില്‍ ധ്യാന നിരതരാകുന്നു. അവര്‍ ക്രിസ്തുവിനെ കാണുന്നു, ഒപ്പം ഫ്രാന്‍സിസിനേയും.
ഈ ചെറിയവരില്‍ ഒരുവന് നന്മ ചെയ്യുന്ന എല്ലാവരും അനുഗ്രഹിക്കപ്പെടുമെന്ന് പറഞ്ഞ് ക്രിസ്തുവിനെ ഓര്‍മ്മിപ്പിക്കുന്ന പാപ്പ. ചില മനുഷ്യര്‍ അങ്ങനേയാണ്.
അവരുടെ ഓര്‍മ്മ എഴുതപ്പെടുന്നത് ശിലകളില്‍ മാത്രമല്ല, മനുഷ്യഹൃദയങ്ങളില്‍ കൂടിയാണ്.
ഫ്രാന്‍സിസിന് മരണമില്ല! അസ്സീസി മുതല്‍ അര്‍ജന്റീന വരെ തെരുവുകളില്‍ അവരുണ്ട്.