313-ല്‍ മാക്‌സെന്‍സിയസിന്റെ മേല്‍ കോണ്‍സ്റ്റന്റൈന്‍ വിജയം കൈവരിച്ചപ്പോള്‍ ഹെലെനായും ക്രിസ്തീയ വിശ്വാസം സ്വീകരിച്ചു. അതൊരു വലിയ തുടക്കമായിരുന്നു. രാജകീയ അധികാരങ്ങള്‍ ഉപയോഗപ്പെടുത്തിക്കൊണ്ട്, താന്‍ സ്വീകരിച്ച വിശ്വാസം പ്രചരിപ്പിക്കാന്‍ ശ്രമിച്ച അവര്‍ ചരിത്രത്തില്‍ ഒരു മാതൃകാമിഷണറിയായിത്തീര്‍ന്നു. യൂറോപ്പില്‍ വിവിധ സ്ഥലങ്ങളില്‍ അനേകം ദൈവാലയങ്ങള്‍ പണികഴിപ്പിച്ച അവര്‍ എഴുപത്തഞ്ചാമത്തെ വയസ്സിലാണ് വിശുദ്ധനാടു സന്ദര്‍ശിക്കുന്നത്. ബത്‌ലഹമില്‍ ഈശോ ജനിച്ച സ്ഥലത്തിനടുത്തും ജറൂസലത്തിനടുത്ത് ഈശോയുടെ സ്വര്‍ഗ്ഗാരോഹണം നടന്ന സ്ഥലത്തും ഹെലെന ഓരോ ദൈവാലയം പണികഴിപ്പിച്ചു.

ക്രിസ്തുവിനെ തറച്ച യഥാര്‍ത്ഥ കുരിശു കണ്ടെത്തിയത് വി. ഹെലെനായുടെ പരിശ്രമത്താലാണെന്ന് കരുതപ്പെടുന്നു. ഏതായാലും, ഈ സംഭവത്തിനുശേഷമാണെന്നു കരുതപ്പെടുന്നു, ഹെലെന റോമിലുള്ള തന്റെ കൊട്ടാരം "Church of Santa Cruce in Gerusalemme" ആക്കി മാറ്റി. യഥാര്‍ത്ഥ കുരിശിന്റെ ഒരു കഷണവും കുരിശില്‍ പീലാത്തോസ് എഴുതിവയ്പിച്ച ഫലകവും ഇന്നും ഈ ദൈവാലയത്തില്‍ സൂക്ഷിച്ചിരിക്കുന്നു.