സ്വതന്ത്രഭാരതമാഹ്‌ളാദത്തിന്‍
സമുദ്രമുള്ളിലൊതുക്കിയിതാ
സംഗീതത്തിന്നലകളില്‍മുങ്ങി
സമ്മോദത്തില്‍ മുഴുകുകയായ്...
എഴുപതുമഞ്ചുംവത്സരമല്ലേ,
തഴുകിയുണര്‍ത്തുന്നഖിലരെയും
അഭിമാനത്താല്‍ ഭാരതജനനിര
അഭിവൃദ്ധിക്കായ് നിലകൊള്‍വൂ!
ഓര്‍മ്മയില്‍ നിറയെ ഗാന്ധിജിയതുപോല്‍
കര്‍മോത്സുകനാം നെഹ്രുവുമായ്
ജീവിതഭാഗ്യം നല്കിയ ധന്യര്‍
ജീവിക്കുന്നു നിനവുകളില്‍...
അടിമത്തത്തില്‍നിന്നീഭാരത-
മുടയവനായ്‌ക്കൊടിനാട്ടുമ്പോള്‍
സ്വാതന്ത്ര്യത്തിന്‍ ത്രിവര്‍ണപതാക
പാതകള്‍തോറുമുയര്‍ത്തുകയായ്
പ്ലാറ്റിനമാണീജൂബിലിഭാരത
മാറ്ററിയിക്കും മധുവര്‍ഷം!
മംഗളമായിരമായിരമരുളാം
മോദം മലരുകള്‍ വിരിയിക്കാന്‍
സ്വര്‍ഗ്ഗാരോപണ സുന്ദരസുദിനം
സ്വതന്ത്രഭാരതജന്മദിനം!
സന്തോഷത്തിനുമാറ്റേറുന്നീ
സ്വര്‍ഗ്ഗമനോഹരതിരുനാളില്‍...
മര്‍ത്യനു തടവറ നല്കുന്നുലകില്‍
മൃത്യുവരുംവരെ പാപത്താല്‍
മൃത്യു പരാജയമേറ്റതു മാനവ
മാതാവിന്‍ കൃപ പൂക്കുകയില്‍...
അമലോദ്ഭവയാം കന്യക ജീവിത-
മതുലമനോഹരമാക്കുകയാല്‍
മരണം താനേ വഴി മാറുകയായ്,
മഹിതം ജീവിതമുണരുകയായ്!
സ്വര്‍ഗാരോപിതമാതാവിന്‍വര
സുന്ദരസുദിനം കൊണ്ടാടാം
ലോകം മുഴുവനുമാഹ്ലാദത്തിന്‍
നാകോത്സവമീ സുദിനത്തില്‍...