കെ എ വര്‍ഗീസ്, തിരുത്തിപ്പുറം
മീനമാസാസുര വേനല്‍ വറുതിയിലും,
വ്യസനപര്‍വമാര്‍ന്ന വ്യഥകാലത്തിലും,
അന്യോന്യം അനുതാപത്താല്‍ ധന്യരായി,
അനുകമ്പാര്‍ദ്രമാക്കീടാം നമുക്കീ നോമ്പുകാലം.
എങ്ങോട്ടുതിരിഞ്ഞുള്ള പൂജയാണുത്തമ-
മെന്നു സന്ദേഹമിരിക്കിലും സഹജരേ...
കരുണാര്‍ദ്രരായീടാം, നാം നമുക്കുള്ളിലേക്കു തിരിയാം
ഹൃദയകവാടം തുറന്നീടാം, നമുക്കീ വ്രതകാലം.
കാമനകളില്‍ കമ്പമേറി താളം പിഴക്കാത്ത.
കമാനങ്ങളില്ലാത്ത ജീവിതാര്‍പ്പണം,
കാണിക്കയേകീടാം കാലത്തില്‍ കൈക്കുമ്പിളില്‍;
കനിവിന്‍ ഉറവയാല്‍ മനം നിര്‍മ്മലമാക്കീടാം നമുക്കീ പുണ്യകാലം.