കാറില്‍ കേറി ഡോറടച്ചാല്‍ ഇറങ്ങുംവരെ പാട്ടു കേള്‍ക്കണം
സദ്യ ഉണ്ണാനിരുന്നാല്‍ ഊണു കഴിയും വരെ മാത്രമല്ല
പരിസരം വിട്ട് പുറത്താകുംവരെ പാട്ടു കേള്‍ക്കണം.
പൊതുസമ്മേളനത്തിനെത്തിയാല്‍ അതിഥികളെത്തുംവരെ പാട്ടു കേള്‍ക്കണം
സ്വസ്ഥമായിത്തിരി നേരമിരിക്കുവാന്‍ പള്ളിയില്‍ കേറി, എങ്കിലും
കൈവിരല്‍ കര്‍ണപുടത്തിലിട്ട് പുറത്തിറങ്ങി; തല സ്വസ്ഥമാകാന്‍.
ഇനിയുമുണ്ടിതുപോലെ എന്നെ ഓടിച്ചു പിടിച്ചിരുത്തി
കേള്‍ക്കെടാ, നിനക്കില്ലേ സംഗീതമാസ്വദിക്കാന്‍ കഴിവ്
എന്നു പറഞ്ഞെന്‍റെ കാതുകളില്‍ അടിച്ചുകേറ്റും ഘോരശബ്ദം!
ധ്യാനകേന്ദ്രത്തിന്‍റെ വണ്ടിയില്‍ കേറിയാല്‍ അവിടെയും പാട്ട്
ഭക്തിഗാനമെന്നു പറഞ്ഞാലും ഉള്ളില്‍ ഭീതി കേറ്റുന്ന ഗര്‍ജ്ജനം!
ഡ്രൈവറോടു ചോദിച്ചു ഞാന്‍ ആ പാട്ടു നിര്‍ത്താമോ?
അച്ചാ, ധ്യാനകേന്ദ്രത്തിലേ- പാട്ടാണ്; അതു കേള്‍ക്കേണ്ടെന്നോ?
എനിക്കു നിന്നെ കേള്‍ക്കാനാണിഷ്ടം
ഇത്തിരിനേരമല്ലേ നമ്മള്‍ ഒരുമിച്ചുണ്ടാകൂ.
പറയൂ, വീട്ടിലാരൊക്കെയുണ്ട്?
നിന്‍റെ വീട്ടിലെ വിശേഷങ്ങളാണ്
എനിക്കിഷ്ടപ്പെട്ട ഗാനം!