2025 ഡിസംബർ 20-ന് മധ്യപ്രദേശിലെ ജബൽപൂരിൽ, കാഴ്ചവൈകല്യമുള്ള കുട്ടികൾക്കായി സംഘടിപ്പിച്ച ക്രിസ്മസ് ഉച്ചവിരുന്ന് ഒരു പ്രാദേശിക ബിജെപി നേതാവിന്റെ നേതൃത്വത്തിൽ ഒരു ജനക്കൂട്ടം തടസ്സപ്പെടുത്തി. അവർ ഒരു അന്ധയായ സ്ത്രീയെ ഉപദ്രവിക്കുകയും, കടുത്ത ചീത്ത വിളിക്കുകയും, ആ കൂട്ടായ്മയെ നിർബന്ധിത മതപരിവർത്തനം എന്ന് ആരോപിക്കുകയും, സംസ്കാരം സംരക്ഷിക്കാനെന്ന പേരിൽ ആ ദുർബലരായ കുട്ടികളെ ഭയപ്പെടുത്തുകയും ചെയ്തു.

നോമ്പുകാലം ദുർബലരോടുള്ള ക്രിസ്തുവിന്റെ അനുകമ്പയുടെ രഹസ്യത്തിലേക്ക് നമ്മെ ക്ഷണിക്കുന്നു. യേശു കുട്ടികളെ തന്റെ പക്കലേക്കു സ്വാഗതം ചെയ്തു, ‘കൊച്ചുകുട്ടികൾ എന്റെ അടുക്കൽ വരട്ടെ’ എന്ന് പറഞ്ഞു, പാർശ്വവൽക്കരിക്കപ്പെട്ടവരു മായി സ്വയം താദാത്മ്യപ്പെട്ടു - “എന്റെ ഈ ഏറ്റവും ചെറിയ സഹോദരന്മാരിൽ ഒരാൾക്ക് നിങ്ങൾ ചെയ്യുന്നതെല്ലാം എനിക്കു ചെയ്യുന്നതാണ്.” ഒരു ലളിതമായ വിരുന്നിൽ ആഹാരം കഴിക്കാനെത്തിയ അന്ധരായ കുട്ടികളെ ഭയപ്പെടുത്തുന്നത് ക്രിസ്തുവിനെ തന്നെ, യാതൊരു ചെറുത്തുനിൽപ്പിനും സാധ്യതയില്ലാത്ത അവസ്ഥയിൽ, മുറിവേൽപ്പിക്കുക എന്നതാണ്.

ഈ സംഭവം നമ്മുടെ ആത്മീയമായ അന്ധതയെ തുറന്നുകാട്ടുന്നു: മറ്റുള്ളവരുടെ സഹനം നമുക്ക് അസൗകര്യമുണ്ടാക്കുന്നതോ രാഷ്ട്രീയ പിൻബലമുള്ളതോ ആകുമ്പോൾ നാം അതിനെ അവഗണിച്ചു കടന്നുപോകുന്നു. ഇപ്രകാരം തിരഞ്ഞെടുക്കപ്പെട്ട സന്ദർഭങ്ങളിൽ മാത്രം കരുണ കാണിക്കുന്നതിനെ ആത്മപരിശോധന ചെയ്യാൻ നോമ്പുകാലം നമ്മോടാവശ്യപ്പെടുന്നു - നമ്മുടെ ആശ്വാസവുമായി പൊരുത്തപ്പെടുമ്പോൾ മാത്രമേ നാം ദുർബലരെ സംരക്ഷിക്കേണ്ടതുള്ളോ, അതോ ഓരോ അടിച്ചമർത്തപ്പെട്ട കുട്ടിയിലും കഷ്ടപ്പെടുന്ന ക്രിസ്തുവിനെ കാണുന്നുണ്ടോ? അന്ധയായ സ്ത്രീക്ക് ഏറ്റ അവഹേളനം യേശു സഹിച്ച പരിഹാസത്തെ പ്രതിധ്വനിപ്പിക്കുന്നു, നിസ്സംഗതയിൽ നിന്ന് സജീവമായ കാരുണ്യത്തിലേക്കുള്ള മാനസാന്തരത്തിലേക്ക് അതു നമ്മെ വിളിക്കുന്നു.

യേശു അന്ധരെ സ്പർശിക്കുകയും കാഴ്ചയും അന്തസ്സും പുനഃസ്ഥാപിക്കുകയും ചെയ്യുന്നതായി സുവിശേഷം കാണിക്കുന്നു. നോമ്പുകാലത്തിലെ ശിഷ്യത്വം എന്നാൽ ഈ രോഗശാന്തിസ്പർശം അനുകരിക്കുക എന്നാണ്: വ്യക്തിപരമായി നഷ്ടം സഹിച്ചുകൊണ്ടുപോലും, വികലാംഗർക്കും ദരിദ്രർക്കും പീഡിപ്പിക്കപ്പെടുന്നവർക്കും വേണ്ടി വാദിക്കുക. വെറും രോഷത്തിനപ്പുറം ഐകമത്യത്തിലേക്ക് നീങ്ങാൻ നാം വെല്ലുവിളിക്കപ്പെടുന്നു - സന്തോഷം എടുത്തുമാറ്റപ്പെട്ടവരെ പിന്തുണയ്ക്കുക, അവരുടെ ശബ്ദം കേൾക്കുന്നുവെന്ന് ഉറപ്പാക്കുക.

നിരപരാധികൾ അന്യായമായി സഹിക്കുന്നതും എന്നാൽ ക്ഷമ നൽകുന്നതുമായ സ്ഥലമാണ് കുരിശ്. നോമ്പുകാലം നമ്മെ ഈ രഹസ്യത്തെ ആശ്ലേഷിക്കാൻ ക്ഷണിക്കുന്നു: പ്രതികാരം തിരസ്കരിക്കുക, പീഡകർക്കായി മാധ്യസ്ഥം വഹിക്കുക, മുൻവിധികൊണ്ടു കഠിനമാക്കപ്പെട്ട കണ്ണുകൾ ദൈവസ്നേഹത്താൽ തുറക്കപ്പെടുമെന്ന് വിശ്വസിക്കുക. കുട്ടികൾക്ക് മുറിവേൽക്കുമ്പോൾ, അവരെ സംരക്ഷിക്കാനും വളർത്താനും രാജ്യം അവരെ പോലുള്ളവരുടേതാണെന്നതിനു സാക്ഷ്യം വഹിക്കാനും നാം വിളിക്കപ്പെടുന്നു - എല്ലാ ആരോപണങ്ങളെയും മറികടക്കുന്ന ക്ഷമാപൂർവകമായ സ്നേഹത്തിലൂടെ.