ആര്‍ച്ചുബിഷപ് ഷീന്‍: വാഴ്ത്തപ്പെട്ടവനായുള്ള പ്രഖ്യാപനം മാറ്റി വച്ചു
ആര്‍ച്ചുബിഷപ് ഫുള്‍ട്ടന്‍ ജെ. ഷീനിനെ വാഴ്ത്തപ്പെട്ടവനായി പ്രഖ്യാപിക്കുന്നതു മാറ്റി വച്ചു. ഡിസംബര്‍ 21-നു പ്രഖ്യാപനം നടത്തുമെന്നാണ് അറിയിച്ചിരുന്നത്. ഇതു മാറ്റി വച്ചതായി പ്രഖ്യാപനം നടക്കേണ്ടിയിരുന്ന പിയോറിയ രൂപത പത്രക്കുറിപ്പില്‍ അറിയിച്ചു. പ. സിംഹാസനത്തിന്‍റെ നിര്‍ദേശപ്രകാരമാണിതെന്നും പത്രക്കുറിപ്പില്‍ പറയുന്നു. നവംബര്‍ ഒടുവിലാണ് ബിഷപ് ഷീനിനെ വാഴ്ത്തപ്പെട്ടവനായി പ്രഖ്യാപിക്കാന്‍ വത്തിക്കാന്‍ തീരുമാനമെടുത്ത് പിയോറിയ രൂപതയെ അറിയിച്ചത്. എന്നാല്‍ ഡിസംബര്‍ 2 നു നല്‍കിയ അറിയിപ്പില്‍ ഇതു മാറ്റിവയ്ക്കാന്‍ ആവശ്യപ്പെടുകയായിരുന്നു. തനിക്കും ബിഷപ് ഷീനിന്‍റെ ഭക്തര്‍ക്കും ഇതില്‍ കടുത്ത ദുഃഖമുള്ളതായി പിയോറിയ ബിഷപ് പറഞ്ഞു. ആര്‍ച്ചുബിഷപ് ഷീനിന്‍റെ കാര്യത്തില്‍ കൂടുതല്‍ അന്വേഷണങ്ങള്‍ ആവശ്യമുള്ളതായി അമേരിക്കന്‍ മെത്രാന്മാരില്‍ ചിലര്‍ അറിയിച്ചതിനെ തുടര്‍ന്നാണു പ്രഖ്യാപനം നീട്ടിയതെന്നു വത്തിക്കാന്‍ വ്യക്തമാക്കി.
