ആഗസ്റ്റ് 31 മുതല്‍ അഞ്ചു ദിവസം ഫ്രാന്‍സിസ് മാര്‍പാപ്പ മംഗോളിയായില്‍ പര്യടനം നടത്തും. ചൈനയുമായി മൂവായിരത്തോളം മൈല്‍ അതിര്‍ത്തി പങ്കിടുന്ന മംഗോളിയ ലോകത്തിലെ ഏറ്റവും ജനസംഖ്യ കുറഞ്ഞ രാഷ്ട്രങ്ങളിലൊന്നാണ്. 30 ലക്ഷം ജനങ്ങളില്‍ കത്തോലിക്കര്‍ 1,300 മാത്രം. 1922-ല്‍ ഇവിടെ കത്തോലിക്കസഭയുടെ മിഷന്‍ ആരംഭിച്ചുവെങ്കിലും കമ്യൂണിസ്റ്റ് ഭരണത്തിനു കീഴില്‍ 1992 വരെ മതസ്വാതന്ത്ര്യം ഇല്ലാത്ത സ്ഥിതിയായിരുന്നു. മംഗോളിയായുടെ ആദ്യത്തെ തദ്ദേശീയ വൈദികന്‍ അഭിഷിക്തനാകുന്നത് 2016-ലാണ്.

മംഗോളിയായിലെ ചെറിയ സഭയ്ക്കായി സേവനം ചെയ്തു വരുന്ന മിഷണറിയായ 48-കാരനെ കഴിഞ്ഞ വര്‍ഷം മാര്‍പാപ്പ കാര്‍ഡിനല്‍ പദവിയിലേക്ക് ഉയര്‍ത്തിയിരുന്നു. മംഗോളിയായിലെ ഉലാന്‍ബാത്തര്‍ അപ്പസ്‌തോലിക് പ്രീഫെ ക്ട് കാര്‍ഡിനല്‍ ജ്യോര്‍ജിയോ മാരെംഗോ ആണത്.

ച. മൈലില്‍ 5 പേര്‍ മാത്രം അധിവസിക്കുന്ന മംഗോളിയായിലെ ജനങ്ങളില്‍ 30 ശതമാനത്തോളം പേര്‍ നാടോടികളോ അര്‍ധ നാടോടികളോ ആണ്. സമുദ്രതീരം ഇല്ലാത്ത രാജ്യം കൂടിയാണ് മംഗോളിയാ.