പാപ്പായുടെ വേനല്ക്കാല വസതിയായ, കാസല് ഗണ്ടോള്ഫോയിലെ ഉദ്യാനത്തില് സ്ഥിതി ചെയ്യുന്ന ലൗദാത്തോ സി ഗ്രാമത്തില് ജൂലൈ 11-ന്, പാവപ്പെട്ടവര്ക്കായി പ്രത്യേക ഉച്ചഭക്ഷണം ഒരുക്കി. 35 കുട്ടികള് ഉള്പ്പെടെ യുള്ള നിരാലംബരായ ആളുകളാണ് ഈ ചടങ്ങില് അതിഥികളായി എത്തിയത്.
സഭ എന്നത് എല്ലാവരെയും ഉള്ക്കൊള്ളുന്ന ഒരു തുറന്ന കുടുംബമാണെന്നും, ഏറ്റവും കൂടുതല് സഹായം ആവശ്യമുള്ളവര്ക്ക് അതൊരു സുരക്ഷിത താവളമാണെന്നും ലോകത്തിന് കാണിച്ചുകൊടുക്കുകയാണ് ഈ സംരംഭത്തിന്റെ പ്രധാന ലക്ഷ്യമെന്നു സംഘാടകര് പറഞ്ഞു. അഭയാര്ത്ഥികള്, ഒറ്റയ്ക്കുള്ള അമ്മമാര്, ഭിന്നശേഷിക്കാര് തുടങ്ങിയവരാണ് ഈ വര്ഷം അതിഥികളായി എത്തിയത്.
പാവപ്പെട്ടവര് വെറും സഹായം സ്വീകരിക്കുന്നവര് മാത്രമല്ല, മറിച്ച് അവരുടെ സാന്നിധ്യത്തിലൂടെ സമൂഹത്തിന് പുതിയൊരു കാഴ്ചപ്പാട് നല്കുന്നവരാണെന്ന് സംഘാടകന് ദൊണാത്തെല്ല പാരിസി പറഞ്ഞു. ലോകത്തെ മറ്റൊരു രീതിയില് കാണാന് അവര് നമ്മെ പഠിപ്പിക്കുന്നുവെന്നു ദൊണാത്തെല്ല കൂട്ടിച്ചേര്ത്തു.