അടുത്ത വര്‍ഷം സെപ്തംബര്‍ 25 മുതല്‍ 27 വരെ തീയതികളില്‍ കുട്ടികളുടെ രണ്ടാം ആഗോള ദിനാചരണങ്ങള്‍ റോമില്‍ നടക്കുമെന്ന് ലിയോ പതിനാലാമന്‍ പാപ്പ അറിയിച്ചു. ഈ ആഗോളദിന ത്തിലേക്കായി തയ്യാറാക്കിയ ഔദ്യോഗിക ചിഹ്നമുള്ള പതാക പാപ്പ ആശീര്‍വദിച്ചു. ലോകമെമ്പാടും നിന്നുള്ള കുട്ടികള്‍ക്കും അവരുടെ കുടുംബങ്ങള്‍ക്കുമുള്ള കണ്ടുമുട്ടലിന്റെയും പ്രാര്‍ഥനയുടെയും ദിനങ്ങളായിരിക്കും സെപ്തംബറില്‍ നടക്കുകയെന്ന് കുട്ടികള്‍ക്കായുള്ള ആഗോളദിനത്തിനുവേണ്ടി യുള്ള പൊന്തിഫിക്കല്‍ കമ്മിറ്റി തങ്ങളുടെ പത്രക്കുറിപ്പിലൂടെ അറിയിച്ചു.
2024 മെയ് മാസത്തില്‍ ഫ്രാന്‍സിസ് പാപ്പായുടെ സാന്നിധ്യത്തില്‍ സെന്റ് പീറ്റേഴ്‌സ് അങ്കണത്തില്‍ നടന്ന കുട്ടികളുടെ പ്രഥമ ആഗോളദിനത്തില്‍ 101 രാജ്യങ്ങളില്‍നിന്നായി ഒരു ലക്ഷത്തിലധികം കുട്ടികള്‍ സംബന്ധിച്ചി രുന്നു. സമാധാനം ആഗ്രഹിക്കുന്ന ഒരു ലോകത്തിന്റെ വക്താക്കളാകാനുള്ള കുട്ടികളുടെ സ്വരം ശ്രവിക്കാനും വിലമതിക്കാനുമുള്ള തങ്ങളുടെ ഉത്തരവാദിത്വം വ്യക്തമാക്കുകയാണ് കുട്ടികള്‍ക്കുള്ള ആഗോളദിനാചരണത്തിലൂടെ സഭയെന്ന് പൊന്തിഫിക്കല്‍ കമ്മിറ്റി വിശദീകരിച്ചു.
കുട്ടികള്‍ക്കായുള്ള ആഗോളദിനത്തിനുവേണ്ടിയുള്ള പൊന്തിഫിക്കല്‍ കമ്മിറ്റിയുടെ പ്രസിഡന്റ് ഫാ. എന്‍സോ ഫോര്‍ത്തുനാത്തോ എന്ന കപ്പൂച്ചിന്‍ വൈദികനും, ഗാസായില്‍നിന്നുള്ള മാജിദ് ബെര്‍ണാര്‍ഡ് എന്ന ഏഴുവയസ്സുകാരന്‍ കുട്ടിയും പാപ്പായ്ക്ക് മുന്നില്‍ ഈ ഔദ്യോഗികദിനത്തിന്റെ പതാക സമര്‍പ്പിച്ചു. കുരിശും, വത്തിക്കാനിലെ വിശുദ്ധ പത്രോസിന്റെ ബസിലിക്കയുടെ മകുട ത്തിന്റെ മാതൃകയിലുള്ള ചിത്രവും, ഏഴ് ഭൂഖണ്ഡങ്ങളെ പ്രതിനിധാനം ചെയ്ത് ഏഴ് കാല്‍പ്പാടു കളും ഔദ്യോഗിക പതാകയിലുണ്ട്.
വിവിധ സംസ്‌കാരങ്ങളെ പ്രതിനിധാനം ചെയ്ത് വിവിധ വര്‍ണ്ണങ്ങളും പതാകയിലുണ്ട്. ക്രിസ്തുവിന്റെ സഹനവും പുനരുത്ഥാനവുമാണ് കുരിശ് പ്രതിനി ധാനം ചെയ്യുന്നതെന്നും, ബസിലിക്കയുടെ മകുടം, ലോകത്തിന്റെ എല്ലായിടങ്ങളിലും നിന്നുള്ള കുട്ടികളെ സ്വാഗതം ചെയ്യുകയും സംരക്ഷിക്കുകയും ചെയ്യുന്നതിന്റെയും, കാല്‍പ്പാടുകള്‍ കുട്ടിക ളുടെ നിഷ്‌കളങ്കതയും ആഗോളപരതയുമാണ് അനുസ്മരിപ്പിക്കുന്നതെന്നും കമ്മിറ്റി വിശദീകരിച്ചു.
സമാധാനത്തിന്റെ ഭംഗി കുട്ടികള്‍ക്ക് കാണിച്ചുകൊടുക്കാനുള്ള ഒരു അവസരമായിരിക്കും ഈ ആഗോളദിനമെന്ന് അല്‍മായര്‍ക്കും കുടുംബങ്ങള്‍ക്കും ജീവനും വേണ്ടിയുള്ള കാര്യാലയത്തിന്റെ അധ്യക്ഷന്‍ കര്‍ദിനാള്‍ കെവിന്‍ ഫാറല്‍ പ്രസ്താവിച്ചു.