ബാര്‍ലെറ്റായില്‍ അര നൂറ്റാണ്ടിനു ശേഷം ഒരു ഉടുപ്പുമാറ്റം
ഇറ്റലിയിലെ ബാര്‍ലെറ്റാ നഗരത്തിലുള്ള ബെനഡിക് ടൈന്‍ സന്യാസിനിമാരുടെ ആശ്രമം 1940-കള്‍ക്കു ശേഷം ആദ്യമായി ഒരു കന്യാസ്ത്രീയുടെ ഉടുപ്പുമാറ്റത്തിനു സാക്ഷ്യം വഹിച്ചു. ഉടുപ്പു സ്വീകരിക്കുന്ന സന്യാസാര്‍ത്ഥിനി മണവാട്ടിയുടെ വേഷത്തിലെത്തി മെത്രാനു മുമ്പില്‍ വച്ചു മുടിമുറിച്ചു സമര്‍പ്പിച്ച്, സന്യാസവസ്ത്രമണിയുന്നതിന്‍റെ ഫോട്ടോകള്‍ അതിരൂപത അവരുടെ ഫേസ്ബുക്ക് പേജിലിട്ടു. വന്‍സ്വീകരണമാണ് ഈ ചിത്രങ്ങള്‍ക്കു സോഷ്യല്‍ മീഡിയായില്‍ കിട്ടിയത്. കാരണം, അനേകവര്‍ഷങ്ങള്‍ക്കു ശേഷമാണ് ഇത്തരം ചടങ്ങുകള്‍ക്ക് ഈ നഗരം സാക്ഷ്യം വഹിച്ചത്. വയോധികരായ ഏതാനും സന്യാസിനിമാര്‍ മാത്രമുണ്ടായിരുന്ന ഈ മഠം അടച്ചുപൂട്ടലിന്‍റെ വക്കിലായിരുന്നു. അതിനിടെയാണ് മൂന്നു വര്‍ഷം മുമ്പ് ഏതാനും യുവതികള്‍ സന്യാസം സ്വീകരിക്കാന്‍ താത്പര്യപ്പെട്ട് ആശ്രമത്തിലെത്തുന്നത്. അതോടെ ആശ്രമം അടയ്ക്കാനുള്ള നീക്കം ഉപേക്ഷിക്കുകയും അവരെ സന്യാസാര്‍ത്ഥിനികളായി പ്രവേശിപ്പിക്കുകയുമായിരുന്നു. 27 വയസ്സുള്ളയാളാണ് ഇപ്പോള്‍ സന്യാസവസ്ത്രം സ്വീകരിച്ചത്.
