രാഷ്ട്രീയം, ജനസേവനത്തിനുള്ള ശുശ്രൂഷാമേഖല

ഈ തദ്ദേശ സ്വയംഭരണ തിരഞ്ഞെടുപ്പില്‍ മത്സരിക്കാനും രാഷ്ട്രീയ പ്രവര്‍ത്തനത്തില്‍ സജീവമാകാനും നിരവധി യുവജനങ്ങള്‍ തീരുമാനിച്ചിട്ടുണ്ട്. തീര്‍ച്ചയായും അതൊരു നല്ല ലക്ഷണമാണ്. മുന്‍കാലങ്ങളെ അപേക്ഷിച്ച് നോക്കുമ്പോള്‍ രാഷ്ട്രീയത്തിലുള്ള നമ്മുടെ യുവജനങ്ങളുടെ സാന്നിധ്യം കുറഞ്ഞുപോയിട്ടുണ്ട് എന്നതാണ് വസ്തുത. പക്ഷേ രാഷ്ട്രീയത്തില്‍ യുവജനങ്ങളുടെ പ്രസക്തി മനസ്സിലാക്കി യുവജനങ്ങള്‍ സ്വയം തിരിച്ചുവരാന്‍ ആരംഭിച്ചിരിക്കുന്നു. അത് വലിയ സന്തോഷമുള്ള കാര്യമാണ്. ആഗ്രഹത്തോടെയും ഉത്തരവാദിത്വത്തോടെയും രാഷ്ട്രീയ രംഗത്തേക്ക് ഇറങ്ങാന്‍ സന്നദ്ധരായ ധാരാളം യുവജന നേതാക്കള്‍ ഇപ്പോള്‍ നമുക്കുണ്ട്. പക്ഷേ ആനുപാതികമായി നോക്കുമ്പോള്‍ ക്രൈസ്തവരുടെ പ്രാതിനിധ്യം കുറവാണ് എന്ന് തന്നെയാണ് തോന്നുന്നത്.

ജനസേവനത്തിനുള്ള ഒരു ശുശ്രൂഷാമേഖലയായി രാഷ്ട്രീയത്തെ കാണണം എന്നതാണ് യുവജനങ്ങളോട് സഭയ്ക്ക് പറയാനുള്ളത്. ആ ഒരു ലക്ഷ്യത്തോടുകൂടിയാണ് ഈ വര്‍ഷം ധാരാളം യുവജനങ്ങള്‍ സജീവ രാഷ്ട്രീയത്തിലേക്ക് കടന്നുവരുന്നത് എന്നാണ് മനസ്സിലാക്കാന്‍ സാധിച്ചിട്ടുള്ളത്. അവരുടെ പ്രകടനപത്രികകളിലും പ്രചാരണ രംഗങ്ങളിലും അവര്‍ നല്‍കുന്ന വാഗ്ദാനങ്ങളിലും ഒക്കെ അതാണ് കാണാന്‍ സാധിക്കുന്നുണ്ട്. ക്രിസ്ത്യന്‍ സംഘടനകളിലൂടെ ലഭിച്ച ക്രൈസ്തവ മൂല്യങ്ങള്‍ അവരെ അതിനു സഹായിക്കുമെന്ന് പ്രതീക്ഷിക്കുന്നു, പ്രത്യാശിക്കുന്നു.

ധാരാളം യുവജനങ്ങള്‍ ജോലിസംബന്ധമായും പഠനസംബന്ധമായും കേരളത്തിനു പുറത്തേക്ക് പോകുന്നു.

ചുരുക്കം പേരെ നാട്ടില്‍ നില്‍ക്കുന്നുള്ളൂ എന്നത് ഒരു പ്രശ്‌നമാണ്. ഉള്ളവരാകട്ടെ പൊതുരംഗത്തേക്ക് ഇറങ്ങുമ്പോള്‍ കുടുംബം, സാമ്പത്തികഭദ്രത തുടങ്ങിയ മേഖലകളില്‍ പ്രശ്‌നങ്ങള്‍ ഉണ്ടാകുമെന്ന് ആശങ്കപ്പെടുന്നുണ്ട്. തങ്ങള്‍ ആഗ്രഹിക്കുന്ന വിധത്തില്‍ നിസ്വാര്‍ത്ഥമായ സേവനം ചെയ്യാന്‍ രാഷ്ട്രീയ കക്ഷികള്‍ അനുവദിക്കുമോ എന്ന സംശയവും അവര്‍ക്കുണ്ട്. മാതൃകകളുടെ അഭാവവും അവര്‍ നേരിടുന്ന ഒരു പ്രശ്‌നമാണ്. വരുന്ന തലമുറയ്ക്ക് തങ്ങള്‍ മാതൃകകള്‍ ആകണം എന്നാഗ്രഹിച്ചു ഈ രംഗത്തേക്ക് വരുന്ന യുവജന നേതാക്കളെയും കാണാന്‍ സാധിക്കുന്നുണ്ട്.

രാഷ്ട്രീയപ്രവര്‍ത്തകരോടും പ്രവര്‍ത്തന മേഖലകളോടും മുമ്പുണ്ടായിരുന്ന താത്പര്യം ഇപ്പോള്‍ യുവജനങ്ങള്‍ക്ക് ഇല്ല എന്നാണ് പൊതുവെ കാണപ്പെടുന്നതെങ്കിലും ഈയൊരു വര്‍ഷം ധാരാളം പേര്‍ അതിനോട് ആഗ്രഹം പ്രകടിപ്പിച്ച് പൊതുരംഗത്തേക്ക് കടന്നുവന്നിട്ടുണ്ട്.

രാഷ്ട്രീയത്തിലേക്കുള്ള പ്രവേശനത്തെ പിന്തുണയ്ക്കാന്‍ നേതൃത്വ പരിശീലന ക്യാമ്പുകള്‍, പഠന ശിബിരങ്ങള്‍ തുടങ്ങിയവ ഒരുക്കാവുന്നതാണ്. നല്ല മാതൃകകളെ മുന്നോട്ടു വച്ച് പ്രോത്സാഹിപ്പിക്കണം. നിലവിലുള്ള നേതാക്കന്മാര്‍ പലരും പറയുന്ന ചില കാര്യങ്ങളുണ്ട്. തങ്ങള്‍ രാഷ്ട്രീയ രംഗത്ത് ശോഭിക്കു മ്പോള്‍ ഇവര്‍ സഭയുടെ ഭാഗമാണ് എന്ന് പറയാനും ചേര്‍ത്തുനിര്‍ത്താനും സഭാധികാരികള്‍ തയാറാകുന്നു. അതു നല്ലതുമാണ്. എന്നാല്‍, വളര്‍ന്നതിനുശേഷം തങ്ങളെ സ്വന്തമാക്കുന്ന സഭാധികാരികള്‍ക്ക് വളര്‍ച്ചയുടെ പാതയില്‍ തങ്ങളെ കുറെക്കൂടി പ്രോത്സാഹിപ്പിക്കാ മായിരുന്നു. ഇത് ഒരു വിമര്‍ശനമാണ്. ഇത് ഉള്‍ക്കൊണ്ട്. കുറെക്കൂടി ശ്രദ്ധ രാഷ്ട്രീയരംഗത്തുള്ളവര്‍ക്ക് നല്‍കാന്‍ സഭയ്ക്ക് സാധിക്കണം എന്നതാണ് എന്റെയും അഭിപ്രായം. എല്ലാ തട്ടിലും ഈ പ്രോത്സാഹനം ഉണ്ടാകണം. സഭ എന്നാല്‍ മെത്രാന്മാരോ വൈദികരോ കന്യാസ്ത്രീകളോ മാത്രമല്ല. കുടുംബങ്ങളുടെ തലത്തിലും രാഷ്ട്രീയപ്രവര്‍ത്തകരെ പ്രോത്സാഹിപ്പിക്കേണ്ടിയിരിക്കുന്നു. കുടുംബങ്ങളില്‍ നിന്നും നല്ല നേതാക്കളെ വളര്‍ത്തിയെടുക്കാനുള്ള പരിശ്രമവും അതിനാവശ്യമായ സാഹചര്യങ്ങള്‍ ഒരുക്കാനുള്ള സന്നദ്ധതയും ഉണ്ടാകണം. രാഷ്ട്രീയ മേഖലയിലെ നന്മകളെയും ഉണ്ടാകേണ്ട നന്മകളെയും കുറിച്ച് ഓര്‍മ്മപ്പെടുത്തി മക്കളെ വളര്‍ത്തിക്കൊണ്ടു വരണം.

തദ്ദേശസ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പുകള്‍ അടുത്ത് നില്‍ക്കുന്ന ഈ സാഹചര്യ ത്തില്‍ സഭ നിഷ്പക്ഷ മനോഭാവത്തോടെയാണ് രാഷ്ട്രീയത്തെ സമീപിക്കുന്നത്. സമൂഹത്തിനുവേണ്ടി നല്ല വികസന പദ്ധതികള്‍ മുന്നോട്ടുവയ്ക്കാനും അതു നടപ്പിലാക്കുന്നതിനും ആര് തയ്യാറാകുന്നുവോ അവരോട് നമ്മോട് ചേര്‍ന്ന് നില്‍ക്കുന്നു എന്ന് ഉറപ്പുവരുത്തി മുന്നോട്ടു പോകുകയാണ്. നമ്മുടെ പ്രസ്ഥാനങ്ങള്‍ വഴിയും സംഘടനകള്‍ വഴിയും വളര്‍ന്നുവന്നിരിക്കുന്ന നല്ല നേതാക്കളെ സമൂഹത്തിന്റെ മുമ്പില്‍ സഭ ഉയര്‍ത്തി ക്കാട്ടുന്നു. അവര്‍ക്ക് അവസരം നല്‍കിയാല്‍ നല്ലത്. സഭയുടെ അല്മായ യുവനേതാക്കളെ ഉയര്‍ത്തിക്കാണിച്ചു സഭയുടേതായ രീതിയില്‍ അവര്‍ക്ക് പ്രോത്സാഹനം നല്‍കണം. അപ്പോള്‍ അത് സഭയ്ക്ക് എന്നതിനേക്കാള്‍ സമൂഹത്തിന് ഉപകാരമായി മാറും. അവിടെ സങ്കുചിതമായ താത്പര്യങ്ങള്‍ യാതൊന്നും സഭയ്ക്ക് ഇല്ല.