മരിക്കാന്‍ കൊതിച്ച്

പല നാളുകള്‍

പല നേരങ്ങളില്‍

ഇടവഴികള്‍ കയറി

കിഴക്കുമാറിയൊരു

മലയുണ്ടതിനുച്ചിയിലായി

ചെന്ന് നില്‍ക്കും.

• അവിടെ നിന്നും പലപ്പോഴും

• പുലരിയുടെ പുഞ്ചിരി

• കാതില്‍ കേള്‍ക്കാം.

• ചിലപ്പോള്‍

• അവിടെ നിന്നും പലപ്പോഴും

• രാവിന്റെ അട്ടഹാസം

• കാതില്‍ കേള്‍ക്കാം.

പലനാളുകളില്‍ പതിവായി

മരണമെന്നെ തഴുകുന്നുണ്ട്.

ഇണയുടെ കൊഞ്ചല്‍ ചിരിയോടെ

പുണരുന്നുണ്ട്.

ഒരുനാളില്‍ ഒന്നായി ചേരുവനായി

ഞാനും കൊതിച്ചിരുന്നു.

• പക്ഷെ!

• ഏറെ ദൂരെ നിന്നും പ്രഭാതമുറക്കെ

• ചോദിക്കും.

• നിറങ്ങള്‍ പലതുണ്ടായിട്ടും

• എന്തിന് നീയൊരു നിറം തേടുന്നു?

• കണ്ണുകള്‍ ചിമ്മാതെ

• കണ്ടുനീ അറിഞ്ഞിട്ടും

• അന്ധനായി പോയതെന്തേ?

ഞാനെന്റെ ശബ്ദമില്ലാത്ത

ജീവിതകാലം തുടരെ ചിന്തിച്ചു.

അടഞ്ഞു മൂടിയ ചെപ്പിനുള്ളില്‍

മഞ്ചാടിക്കുരുവിനോളം

നിറമുള്ളൊരു ഹൃദയം

ഞാന്‍ കണ്ടെത്തി.

• ജീവിതമെന്തെന്ന് അറിയാന്‍

• ജീവിക്കണമെന്നാരോ പറഞ്ഞത്

• ഈ നിമിഷം കാതുകളില്‍

• പതിഞ്ഞ സ്വരത്തില്‍

• സപ്തസ്വരങ്ങള്‍ ചേര്‍ത്ത്

• പാടുമ്പോള്‍

• മിഴികള്‍ തുളുമ്പുന്നതും

• പുഴയായി ഒഴുകുന്നതും

• കടലായിയലയുന്നതും

• തിരയായിയുയരുന്നതും

• ഞാനറിയുന്നു.