ഹൈസ്കൂൾ ക്ലാസ്സുകളിൽ പഠിക്കുന്ന സെൻ്റ് ആൻസ് ചാരിറ്റബിൾ ഇൻസ്റ്റിറ്റ്യൂട്ടിലെ വിദ്യാർത്ഥികൾക്ക്, സെൻ്റ് തോമസ് കോളേജിലെ എൻ.എസ്.എസ്. വിദ്യാർത്ഥികൾ അധ്യയന പിന്തുണ നൽകും. സാന്തോം അക്കാദമിക് & സോഷ്യൽ അസിസ്റ്റൻസ് പ്രോഗ്രാമിൻ്റെ ഭാഗമായി സേവ്യർ ബോർഡ് ഓഫ് എജുക്കേഷൻ, ഇന്ത്യയുടെ സഹകരണത്തോടെയാണ് അവധി ദിവസങ്ങളിൽ പ്രോഗ്രാം സംഘടിപ്പിക്കുന്നത്. അധ്യാപകരും എൻ.എസ്.എസ്. വളണ്ടിയർമാരും വിദ്യാർത്ഥികളും നേതൃത്വം നൽകുന്ന പരിപാടി,സെൻ്റ് തോമസ് കോളേജ് 2010 മുതൽ ആരംഭിച്ചതാണ്. ഈ അധ്യയന വർഷത്തെ പ്രോഗ്രാമിന് ഇതോടെ തുടക്കമായി.
സെൻ്റ് തോമസ് കോളേജ് പ്രിൻസിപ്പാൾ- റവ. ഡോ. മാർട്ടിൻ കൊളമ്പ്രത്തിൻ്റെ അധ്യക്ഷതയിൽ കൂടിയ യോഗം സെൻ്റ് ആൻസ് ചാരിറ്റബിൾ ഇൻസ്റ്റിറ്റ്യൂട്ട് ചെയർമാൻ - റവ.ഫാ. ജോർജ്ജ് എടക്കളത്തൂർ ഉദ്ഘാടനം ചെയ്തു. സെൻ്റ് ആൻസ് കോൺവെൻ്റ് മദർ സുപ്പീരിയർ- റവ. സി. ലിൻസി ജോൺ, എൻ.എസ്.എസ്. പ്രോഗ്രാം ഓഫീസർമാരായ ഡോ. ഡെയ്സൻ പാണേങ്ങാടൻ, ഡോ. റീജ ജോൺസൺ എന്നിവർ ആശംസകളർപ്പിച്ചു. ചാരിറ്റബിൾ ഇൻസ്റ്റിറ്റ്യൂട്ടിലെ വിദ്യാർത്ഥിനികളുടെ ചുമതലയുള്ള റവ. സി. ജീസ് റോസ് സ്വാഗതവും അനു ജോസഫ് നന്ദിയും പറഞ്ഞു.