ജോസ് വടക്കേത്തറ
മൈക്രോ പ്രൊസസറും ആർട്ടിഫിഷ്യൽ ഇന്റലിജൻസും അനന്തമായ ആപ്ലിക്കേഷനുകളും അടങ്ങിയ ഏറ്റവും പുതിയ ഐഫോൺ വല്യപ്പന് കൊച്ചുമോൾ നാട്ടിലെത്തിയപ്പോൾ സമ്മാനിച്ചു. കോൾ വിളിക്കാനും ഫേസ്ബുക്ക് നോക്കാനും മാത്രം അത് ഉപയോഗിക്കുന്ന വല്യപ്പനെപ്പോലെയാണ് നമ്മളിൽ പലരും. ഏറെ വിലമതിക്കുന്ന ആ ഫോണിന്റെ വിസ്മയകരമായ സാധ്യതകൾ അദ്ദേഹം തൊട്ടറിയുന്നില്ല. അതുപോലെയാണ് ദൈവം മനുഷ്യനിൽ നിക്ഷേപിച്ചിരിക്കുന്ന അനന്തമായ സാധ്യതകളും.
യേശുവിന്റെ വാക്കുകൾ ഓർക്കുക: "എന്നിൽ വിശ്വസിക്കുന്നവൻ ഞാൻ ചെയ്യുന്ന പ്രവൃത്തികളും ചെയ്യും; അതിലും വലിയവയും അവൻ ചെയ്യും" (യോഹന്നാൻ 14:12). ഒപ്പം മർക്കോസ് 9:23 ഓർമ്മിപ്പിക്കുന്നു: "വിശ്വസിക്കുന്നവന് എല്ലാം സാധ്യമാണ്."
എന്നാൽ ബൈബിൾ വെളിച്ചത്തിൽ നോക്കുമ്പോൾ, സ്രഷ്ടാവിന്റെ പ്രതിച്ഛായയിൽ തീർത്ത ആത്മാവിന്റെ ഈ മഹാശക്തികളെ തിരിച്ചറിയാതെ, ലൗകികമായ നിസ്സാരതകളിൽ തളച്ചിടപ്പെട്ടിരിക്കുകയാണ് നമ്മൾ മനുഷ്യർ.
ഉള്ളിൽ അനന്തതയുടെ സാമ്രാജ്യമുണ്ടായിട്ടും, അവിശ്വാസം കൊണ്ടും ഭയം കൊണ്ടും അവൻ തന്റെ ജീവിതത്തെ ഒരു ചെറിയ തടവറയാക്കി മാറ്റുന്നു.
ഐഫോണിന്റെ യഥാർത്ഥ കരുത്ത് തിരിച്ചറിയുമ്പോൾ അത് ലോകം മാറ്റുന്നതുപോലെ, ഉള്ളിലെ ദൈവീക സാധ്യതകളെ തിരിച്ചറിഞ്ഞ് വിശ്വസിക്കുമ്പോൾ മനുഷ്യൻ അദ്‌ഭുതങ്ങൾ തീർക്കും. പരിമിതികളുടെ ആധികളുപേക്ഷിച്ച്, ഉള്ളിലെ ആ അനന്ത വെളിച്ചത്തെ പുറത്തെടുക്കുക—അതാണ് മനുഷ്യൻ പൂർത്തിയാക്കേണ്ട ഏറ്റവും വലിയ നിയോഗം.
ഐഫോൺ കയ്യിൽ വെച്ചാൽ മാത്രം പോരാ, അതിന്റെ സാധ്യതകൾ തൊട്ടറിയാൻ ആപ്പ് സ്റ്റോറും സെറ്റിങ്സും പഠിക്കേണ്ടതുപോലെ, മനുഷ്യനും തന്റെ ഉള്ളിലെ വലിയ ലോകം തുറക്കണമെങ്കിൽ വചനത്തിൽ വേരുറച്ച് നിരന്തരം പ്രയത്നിക്കണം.