ഇടമിത്തിരിയിരന്നീരാവിലിപ്പൊഴും
ഇടനാഴികള്‍തോറുമലയുന്നൂ ഞാന്‍!
ഇടനെഞ്ചിലെന്നജഗണമേകുമോയിടം
ഇടയനെനിക്കു പിറന്നീടുവാന്‍?
ഇവിടിന്നുമന്നുബെത്‌ലഹേമിലെന്നപോല്‍
ഇഞ്ചുപോലുമിടം ബാക്കിയില്ല!
ഇഷ്ടലാഭംതേടി മര്‍ത്ത്യഹൃത്താരുകള്‍
ഇത്രയിടുങ്ങിയോ പാര്‍ത്തലത്തില്‍?
ഈര്‍ഷ്യ, വിദ്വേഷം, ചതിയെന്നിവയുടെ
ഈര്‍പ്പമാണെവിടെയും തങ്ങിനില്ക!
ഈടുള്ള ബന്ധങ്ങളില്ല; വിലാപത്തിന്‍-
ഈറ്റൊലിമാത്രമേ കേള്‍പ്പതുള്ളൂ!
ഇച്ഛസാഫല്യത്തിനായ് കൂട്ടരെവരെ
ഇല്ലായ്മചെയ്യുവോരുണ്ടിവിടെ!
ഇടറിവീണവശരായ് ദുര്‍മോഹവഴികളില്‍
ഇഴയുന്ന ജന്മങ്ങളാണേറെയും!
ഇരവുപകലുകള്‍തന്നുടെ ദീര്‍ഘമാം
ഇരുപത്തിനാലുമണിക്കൂറുകള്‍
ഇനിയും തികയാതെ കഴിയുന്നൂ മാനവര്‍
ഇളയാകുമീവല്യസത്രമൊന്നില്‍!
ഇത്തിരിപ്പോന്നൊരു ഫോണിലാണേവരും
ഇന്ദ്രിയമഞ്ചുമുടക്കി നില്ക!
ഇടതടവില്ലാതതില്‍വ്യാപരിക്കയാല്‍
ഇരകളാണവരാത്മയര്‍ബുദത്തിന്‍!
ഇങ്കുനല്കിപ്പോറ്റിവന്ന മാതാക്കളും,
ഇല്ലായ്മ തീര്‍ത്ത പിതാക്കന്മാരും,
ഇട്ടെറിയപ്പെട്ടുപോകുമീ ഭൂമിയില്‍
ഇപ്പടിയെത്രനാള്‍ നീങ്ങിടും ഞാന്‍?
ഇത്രമേലോമനിച്ചാശയര്‍പ്പിച്ചു ഞാന്‍
ഇന്നോളം പാലിച്ച ഹൃദയങ്ങളില്‍
ഇക്കുറിയുമൊന്നുകുഞ്ഞായ് പിറക്കുവാന്‍
ഇല്ലേയെനിക്കല്പമിടമിപ്പൊഴും?
ഇനി മതി യാത്രയിടംതേടിയൂഴിയില്‍
ഇവിടെനിക്കൊരുതരീം ലഭ്യമല്ല!
ഇഷ്ടദാനംപോലെ കാലികളേകിയ
ഇത്തിരിയിടമതു മതിയെനിക്ക്!
ഈശ്വരപുത്രനായിന്നും പിറന്നിടും
ഈശോയ്ക്കു നമ്മുടെ ഹൃത്തടങ്ങള്‍
ഈറ്റുപുരകളായ് മാറ്റിടായ്കിലവന്‍
ഈറന്‍മുഖനായ് കടന്നുപോകും.
