ജോസഫ് മണ്ഡപത്തില്‍
കാത്തിരിപ്പാണീ ജീവിതം, യഥാ;
കാത്തിരിക്കും മാനവരാണ് നാമെല്ലാം, തഥാ;
കാത്തിരിക്കുന്നതോ ഒരു നല്ല നാളെയ്ക്കായ്;
കരുണാമയനായ കര്‍ത്താവിനെ, നിനച്ചുകൊണ്ട്.
ക്രിസ്മസ്സിനപ്പുറം, മറ്റൊരു കാത്തിരിപ്പാണീ ഈസ്റ്റര്‍ കാലം.
ക്രിസ്മസ്സൊരു സന്തോഷപ്രതീകമുണര്‍ത്തുമെങ്കില്‍,
ഈസ്റ്ററൊരു ദുഃഖവെള്ളിതന്‍ അനുബന്ധവം.
പുനരുദ്ധാനത്തിന്‍ കയ്‌പ്പേറും തീര്‍ച്ച-
ദുഃഖവെള്ളി ഒരു കഠിനസഹനാമായെടുത്തോര്‍ക്ക്.
ക്രിസ്മസ്സ് ഒരാരംഭമെങ്കില്‍, ഈസ്റ്ററൊരു-
പുനരാരംഭമാണെന്നോര്‍ക്കുക നീ...
സഹനത്താല്‍ ക്രിസ്തുവിനോട് കൂടെ നാമുയിര്‍ക്കുമ്പോള്‍,
ഒരസ്തമനശേഷം സംജാതമാകുമീ ഉദയമാണതെന്നോര്‍ക്കുക നീ...
നന്മകള്‍ ചെയ്യാമീ ഇടവേളയില്‍ മാനവകുലത്തിനായ്,
തിന്മകളെയകറ്റാം നമ്മള്‍ തന്‍ ശിഷ്ടകാലം.
നല്‍ചിന്തകളന്വര്‍ത്തമാക്കാമീ ധന്യവേളയില്‍;
നമ്മെ ശുദ്ധരാക്കും മറ്റൊരു നോമ്പുകാലം കൂടി.
അന്‍പത് ദിനരാത്രങ്ങള്‍ തികയ്ക്കും നാമീ നോമ്പുകാലം;
സഹനാര്‍പ്പണത്തിനായ് മാറ്റിവയ്ക്കുമീ നോമ്പുകാലം.
വീണ്ടും സമാഗതമാകുന്നൊരീ നോമ്പുകാലം, ധന്യകാലം.
സഹനങ്ങളും, പ്രാര്‍ത്ഥനാനുഷ്ഠാനങ്ങളം,
കൈകോര്‍ത്ത് പങ്കുവയ്ക്കുമീ നോമ്പുകാലം
നാം സ്‌നേഹിക്കുമെന്ന് കരുതുന്നവര്‍ക്കായി
ബാക്കിവയ്ക്കാമീ ധന്യകാലം ഈ നോമ്പുകാലം.
ഈസ്റ്ററെന്ന പുനരുദ്ധാരണത്തിന്
സാക്ഷികളാകുവാന്‍ കാത്തിരിക്കാം, സഹനത്തോടെ, സ്‌നേഹത്തോടെ.
ഒരു പുതുപുത്തനനുഭവമാകട്ടെ ഈസ്റ്ററെന്നും നമുക്കെല്ലാം.
അഗ്നിയില്‍ സ്ഫുടം ചെയ്‌തൊരു പുനര്‍ജീവിതമാകട്ടെ-
ഈ നോമ്പുകാലം, ഈ പുണ്യകാലം.
ഒരു പുത്തനനുഭവമാകട്ടെ മാനവര്‍ക്ക്-
ഒരു പുത്തനേട് തുറക്കട്ടെ മര്‍ത്ത്യര്‍തന്‍ പുസ്തകത്തില്‍.
''പ്രഭയോടുയിര്‍ത്തങ്ങേ വരവേല്പിനെത്തീടാന്‍
കൃപയേകണേ ലോകനാഥാ...''
