ചെരാതുകളായിരം-
ഹൃദയത്തില്‍ കൊളുത്തി,
തമസ്സില്‍ നിന്നകറ്റി മാനസത്തെ.
മാടപ്പിറാവിന്റെ ചിറകടിയൊച്ചപോല്‍,
വചനങ്ങള്‍ മൊഴിയുന്ന ദിനരാത്രങ്ങളില്‍,
നോവുകള്‍, നൊമ്പരങ്ങള്‍, അനുഗ്രഹങ്ങളായീടും,
ഈ ധന്യകാലം നോമ്പുകാലും.
മത്സ്യമാംസാദികള്‍ പൂര്‍ണമായി വര്‍ജിച്ച്-
മനം, മദ മാത്സര്യങ്ങളില്‍ നിന്നകന്ന്,
ഉപവാസ പ്രാര്‍ത്ഥനാദികളോടെ,
സദാ ജപമാല കൈയ്യിലേന്തി,
ജപമാലമണികളോരോന്നുമെന്‍-
ഹൃദയത്തുടിപ്പുകളാക്കി മാറ്റി,
ഹൃദയം തുറക്കുന്ന നോമ്പുകാലം.
വചനമനനത്താല്‍ ഇരവുപകലാക്കി,
ധ്യാനാനുഭവമാക്കി പീഠാനുഭവചരിത്രം,
ആത്മീയനിറവാക്കി അമ്പതു ദിനങ്ങള്‍,
അനുതാപ മൂറുന്ന നയനങ്ങളില്‍-
ഉത്ഥാനത്തിന്റെ മഹത്വം ദര്‍ശിക്കുവാന്‍,
അനുരഞ്ജനത്തിന്റെ പാതകളില്‍,
ഇത്, വ്യഥകളകറ്റുന്ന വ്രതകാലം.
