ഫ്രന്‍സി ജൊ
സെന്റ് ജോണ്‍ ദി ബാപ്റ്റിസ്റ്റ് ചര്‍ച്ച്, തെ. പറവൂര്‍
കൂട്ടുകാരേ, നമുക്ക് ഒരു സൂപ്പര്‍ സ്‌പെഷ്യല്‍ ഹൃദയത്തെക്കുറിച്ച് പഠിച്ചാലോ? യേശുവിന്റെ ഹൃദയം, അഥവാ തിരുഹൃദയം!
നമ്മള്‍ ഒരുപാട് ചിത്രങ്ങളില്‍ കണ്ടിട്ടുള്ള ഈ ഹൃദയത്തിന് ഒരുപാട് പ്രത്യേകതകളുണ്ട്.
* ആ ഹൃദയത്തിന്റെ മുകളില്‍ ഒരു തീജ്വാല കാണാം. അത് എന്തിനാണെന്നോ? യേശുവിന് നമ്മളോടുള്ള ഒരുപാട് വലിയ സ്‌നേഹത്തെ കാണിക്കാനാ! ആ സ്‌നേഹം ഒരു തീ പോലെ എന്നും കത്തിനില്‍ക്കും.
* ഹൃദയത്തിന്റെ നടുക്ക് ഒരു കുരിശ് ഉണ്ട്. യേശു നമ്മളെ സ്‌നേഹിച്ചത് കൊണ്ട് നമുക്ക് വേണ്ടി ഒരുപാട് കഷ്ടപ്പാടുകൾ സഹിച്ചു, അതിന്റെ ഓർമ്മയാണത്.
* ഹൃദയത്തിന് ചുറ്റും ഒരു മുള്‍ക്കിരീടം കാണാം. യേശുവിന് കിട്ടിയ വേദനകളെയും സങ്കടങ്ങളെയും അത് ഓര്‍മ്മിപ്പിക്കുന്നു. നമ്മള്‍ക്ക് വേണ്ടി യേശു ഒരുപാട് വിഷമങ്ങള്‍ അനുഭവിച്ചു എന്നാണത് കാണിക്കുന്നത്.
* ഹൃദയത്തില്‍ ഒരു മുറിവുണ്ട്. ആഴത്തിലുള്ള ഒരു മുറിവ്.
* ആ മുറിവില്‍ നിന്ന് രക്തം ഒഴുകുന്നതും കാണാം. അത് യേശു നമ്മളെ അത്രയധികം സ്‌നേഹിച്ചത് കൊണ്ട് നമുക്ക് വേണ്ടി എല്ലാം നല്‍കി എന്നതിന്റെ അടയാളമാണ്.
ഇത്രയധികം വേദനകള്‍ സഹിച്ച ഒരു ഹൃദയം വേറെ എവിടെയെങ്കിലും ഉണ്ടോ? ഇല്ലല്ലേ? ഈ തിരുഹൃദയത്തെപ്പറ്റി ഓര്‍ക്കുമ്പോള്‍ നമുക്ക് യേശുവിനെ ഒരുപാട് ഇഷ്ടമാകും. കാരണം, സ്‌നേഹം എന്താണെന്ന് യേശുവിന്റെ ഹൃദയം നമുക്ക് കാണിച്ചുതരുന്നു.
അതുകൊണ്ട് നമുക്ക് എന്തു ചെയ്യാം?
* നമ്മുടെ കുടുംബങ്ങളെ യേശുവിന്റെ തിരുഹൃദയത്തിന് കൊടുക്കാം. യേശു നമ്മളെയും നമ്മുടെ കുടുംബത്തെയും നോക്കിക്കോളും.
* നമ്മുടെ ജീവിതത്തില്‍ എല്ലാത്തിനും മുകളില്‍ യേശുവിനെ സ്‌നേഹിക്കാം. യേശു നമ്മുടെ ഏറ്റവും നല്ല കൂട്ടുകാരനായിരിക്കും.
* യേശു നമ്മള്‍ക്ക് വേണ്ടി ചെയ്ത നല്ല കാര്യങ്ങളെല്ലാം ഓര്‍ത്ത്, നമ്മളെത്തന്നെ യേശുവിന്റെ തിരുഹൃദയത്തിന് കൊടുക്കാം.
* നമുക്ക് എന്തെങ്കിലും സങ്കടങ്ങള്‍ വരുമ്പോള്‍, ദേഷ്യമില്ലാതെയും പരാതി പറയാതെയും അതൊക്കെ സഹിക്കാന്‍ പഠിക്കാം. യേശു നമ്മളെ സഹായിക്കും.
* യേശുവില്‍ വിശ്വസിച്ചാല്‍ നമുക്ക് മനസ്സില്‍ സന്തോഷവും സമാധാനവും കിട്ടും.
* നമ്മളെ ഇത്രയധികം സ്‌നേഹിച്ച യേശുവിനെ ഒരു നിമിഷം പോലും മറക്കാതിരിക്കാന്‍ നമ്മള്‍ ശ്രദ്ധിക്കണം.
* ‘എന്റെ കുഞ്ഞേ, നിനക്ക് തരാതെ ഒന്നും ഞാന്‍ ബാക്കിവെച്ചിട്ടില്ല’ എന്ന് യേശു പറയുന്നത് കേള്‍ക്കുമ്പോള്‍ നമുക്ക് സങ്കടം വരും, ഒപ്പം യേശുവിനോട് ഒരുപാട് സ്‌നേഹവും തോന്നും.
* അങ്ങനെ നമ്മൾക്ക് യേശുവിന് എല്ലാം കൊടുക്കാന്‍ പറ്റും.
യേശു നമ്മളോട് പതിയെ പറയുന്നു: ‘എന്റെ ഹൃദയത്തിന്റെ വാതില്‍ തുറന്നിട്ടിരിക്കുകയാണ്. എല്ലാവര്‍ക്കും അവിടെ വരാം.’ അവന്റെ ഹൃദയമിടിപ്പ് [heartbeats] ഇങ്ങനെയാണ്: ‘ഞാന്‍ നിങ്ങളെ സ്‌നേഹിക്കുന്നു.’ [I love you]
നമ്മുടെ ഹൃദയങ്ങളെ യേശുവിന്റെ ഹൃദയത്തോട് ചേർത്തുവച്ചാല്‍, ഉണങ്ങാത്ത ഏത് മുറിവിനും ആശ്വാസം കിട്ടും. യേശു എല്ലാം നമുക്കായി തന്ന് സ്‌നേഹിച്ചതിന്റെ വലിയ അടയാളമാണ് തിരുഹൃദയം. സ്‌നേഹം ഉള്ളിടത്ത് ചിലപ്പോള്‍ ചെറിയ സങ്കടങ്ങളും ത്യാഗങ്ങളും ഒക്കെയുണ്ടാകും.
നമ്മള്‍ ഇന്ന് കൂട്ടിവെക്കുന്ന കളിപ്പാട്ടങ്ങളോ മിഠായികളോ ഒക്കെ ഒരുനാള്‍ തീരും. പക്ഷേ, യേശുവിന്റെ ഹൃദയത്തില്‍ നിന്ന് വരുന്ന സമാധാനം എന്നും നമ്മളോടൊപ്പം ഉണ്ടാകും. യേശുവിന്റെ ആ സ്‌നേഹം നിറഞ്ഞ ഹൃദയത്തില്‍ നമുക്ക് എന്നും സന്തോഷത്തോടെ ജീവിക്കാം.
