എം എസ് ചാമക്കാല
''കര്‍ത്താവിനൊപ്പം ഞാന്‍ കാരാഗൃഹത്തിലു-
മെത്താം മരിക്കാനും സന്നദ്ധനാം''
ശങ്കയില്ലാതെ പറഞ്ഞവനാണു ഞാ-
നെങ്കിലും തള്ളിപ്പറഞ്ഞുപോയി
നിന്നെയറിയില്ലയെന്നു ചൊല്ലുമ്പോഴു-
മെന്നുള്ളില്‍ നീയുണ്ടെന്‍ തമ്പുരാനേ
ആ സത്യം സത്യമായങ്ങേക്കറിയില്ലേ
ആത്മാവിന്നുള്ളറ കാണുന്നോനേ!
എങ്കിലും നാവിനാല്‍ തള്ളിപ്പറഞ്ഞവന്‍
നീയെന്നെ തള്ളല്ലേ തമ്പുരാനേ!
എത്ര കഠിനമാം ശിക്ഷയും കല്പിക്കൂ
അത്രയല്ലേറെയും കൊണ്ടുകൊള്ളാം
എത്ര കൊണ്ടാലുമിക്കുറ്റത്തിനൊക്കു കി-
ല്ലത്ര കഠിനമാം പാപമല്ലേ!
അങ്ങേയ്ക്കുവേണ്ടി ഞാന്‍ ക്രൂശില്‍ മരിച്ചിടാം
മുഞ്ചൊന്ന പോലല്ല തമ്പുരാനേ
ഇന്നു കളവു പറഞ്ഞുപോയെങ്കിലു-
മെന്നും ഞാനുച്ചത്തിലുദ്‌ഘോഷിക്കാം
'യേശുവിന്‍ ശിഷ്യനാം പത്രോസു ഞാ'നെന്ന
ശാശ്വത സത്യം ഞാനേറ്റു ചൊല്ലാം.
ക്രൂശില്‍ തലകീഴായാണിയില്‍ തൂങ്ങി ഞാ-
നീ ശിക്ഷ താനെയനുഭവിക്കാം.
മുക്കുവച്ചേരിയിലെന്‍ കുടില്‍ കണ്ടെത്തി-
യമ്മയ്ക്കു ദീനം പൊറുപ്പിച്ചോനേ
ഇപ്പാപഭാരമൊഴിയില്ലൊരിക്കലും
മുപ്പാരില്‍ ഞാനോ ഗുരു നിഷേധി
എത്രയോ പേരുടെ പാപം പൊറുത്തവര്‍-
ക്കത്തല്‍ കളഞ്ഞവനല്ലോ നാഥാ!
നല്ല പാഠങ്ങള്‍ പഠിപ്പിച്ചു തന്നല്ലോ-
യെല്ലാം മറന്നു ഞാന്‍ തെറ്റു ചെയ്തു
ദേവാ! പൊറുക്കണേ തെറ്റിന്നടിമയാ-
യെങ്കിലും നീയെന്നെ തള്ളരുതേ!
ഏതോ മൂഢതയ്ക്കുള്ളിലകപ്പെട്ടി-
ട്ടേവം പറഞ്ഞുപോയെന്നേയുള്ളു
ആനന്ദദായകമാ വചോധാരയി-
ലാമഗ്നനായിട്ടെത്രയോ നാളായ്!
മൂന്നോളം വര്‍ഷമായെന്നിട്ടും നാഥായെന്‍
മൂഢതയ്ക്കുള്ളില്‍ ഞാനന്ധനാണേ
എന്‍ പാപമെല്ലാം ക്ഷമിച്ചാലുമെന്നെന്നും
നിന്നെ പിഞ്ചെല്ലാനനുവദിക്കൂ!
നാഥാ ഞാനോടിയണയട്ടെ നിന്‍ മുമ്പില്‍
പാദത്തില്‍ വീണു കരഞ്ഞിടട്ടേ!!
