ഫാ. ഡോ. സിജോണ്‍ കുഴിക്കാട്ടുമ്യാലില്‍
ക്ലിനിക്കല്‍ ഹെല്‍ത്ത് സൈക്കോളജിസ്റ്റ്
& പ്രൊഫ. മേരിമാതാ മേജര്‍ സെമിനാരി, തൃശ്ശൂര്‍
ജാക്‌സന് എട്ട് വയസ്സായി. അവന് മൂന്നാം ക്ലാസിലാണ് പഠിക്കുന്നത്. അവന് സ്‌നേഹമുള്ള അച്ഛനും അമ്മയും ഒരു സഹോദരിയുമുണ്ട്. പഠനമൊഴിച്ച് മറ്റ് എല്ലാ കാര്യങ്ങളിലും അവന് നല്ല ബുദ്ധിസാമര്‍ത്ഥ്യമാണ്. പഠിക്കാന്‍ ഇരിക്കുക, അവനെ പഠിപ്പിക്കാന്‍ ശ്രമിക്കുക എന്നത് വലിയ കീറാ മുട്ടിയാണ്. മാതാപിതാക്കള്‍ക്കും, അധ്യാപകര്‍ക്കും പഠനകാര്യത്തില്‍ എന്നും തലവേദന സൃഷ്ടിക്കു കയും, ശ്രദ്ധയില്ലായ്മയും, മറ്റ് കുട്ടികളെ ശല്യപ്പെടുത്തുന്നതും അവന്റെ പതിവാണ്. അതുപോലെ അപകടം വിളിച്ച് വരുത്തുന്ന രീതിയില്‍ ഓരോ പ്രവൃത്തികള്‍ ചെയ്യുക, വേഗതയിലുള്ള പ്രവൃത്തികളില്‍ ഏര്‍പ്പെടുക പതിവാണ്. ഇത്തരത്തിലുള്ള സ്വഭാവ പ്രത്യേക തകള്‍ അറ്റന്‍ഷന്‍ ഡെഫിസിറ്റ് ഹൈപ്പര്‍ ആക്ടിവിറ്റി ഡിസോര്‍ ഡര്‍ അഥവാ എ ഡി എച്ച് ഡി ആണെന്ന് കാണാന്‍ കഴിയും.
പതിനഞ്ചു വയസ്സില്‍ താഴെ യുള്ള അഞ്ചുശതമാനം കുട്ടികളില്‍ ഈ രോഗാവസ്ഥയുണ്ട്. ആണ്‍ കുട്ടികളില്‍ പെണ്‍കുട്ടികളേക്കാള്‍ അപേക്ഷിച്ച് മൂന്നിരട്ടി കൂടുതലായി ഇത്തരം അവസ്ഥ കണ്ടുവരുന്നു. എ ഡി എച്ച് ഡി തലച്ചോറിലെ കോശങ്ങളുമായി ബന്ധപ്പെട്ട രോഗാവസ്ഥയാണ്. ഏഴ് വയസ്സിന് മുന്‍പ് രോഗലക്ഷണങ്ങള്‍ ആരംഭിക്കുന്നു.
ലക്ഷണങ്ങള്‍
ശ്രദ്ധകുറവ് കാണിക്കുക: പ്രത്യേകിച്ച് പഠിക്കുന്നതിനും അതുപോലെ മറ്റ് പ്രവര്‍ത്തികള്‍ ചെയ്യുമ്പോഴും അലക്ഷ്യമായ തെറ്റുകള്‍ വരുത്തുക, മറവി, സാമഗ്രികള്‍ നിരന്തരം കളഞ്ഞു പോകുക. തുടര്‍ച്ചയായ ശ്രദ്ധകുറവ് മൂലം തുടര്‍ച്ചയായ സങ്കീര്‍ണ്ണമായ കാര്യങ്ങള്‍ ചെയ്യാന്‍ ബുദ്ധിമുട്ട് അനുഭവപ്പെടുക തുടങ്ങിയവ കാണുന്നു.
അമിത വികൃതി കാണിക്കുക: ഒരിടത്ത് അടങ്ങിയിരിക്കാന്‍ കഴിയാത്ത അവസ്ഥ, അമിതമായ സംസാരം, മറ്റുള്ളവരെ ശല്യപ്പെടുത്തുക എന്നിവ കാണുന്നു.
എടുത്തുചാട്ട പ്രകൃതി കാണിക്കുക: തീരെ ക്ഷമയില്ലാത്ത പ്രകൃതം, ചോദ്യം ചോദിക്കും മുന്‍പ് ഉത്തരം പറയുക, അപകടം വിളിച്ചു വരുത്തുന്ന രീതിയില്‍ റോഡ് മുറിച്ച് കടക്കുക, അമിത ദേഷ്യം കാണിക്കുക, കൃത്യത പാലിക്കാന്‍ സാധിക്കാത്ത അവസ്ഥ എന്നിവയാണ്.
കാരണങ്ങള്‍
ജനിതകകാരണങ്ങള്‍ പ്രധാന പങ്കുവഹിക്കുന്നു. മാതാപിതാക്കള്‍ക്ക് രോഗാവ സ്ഥയുണ്ടെങ്കില്‍ ഇത് വരാനുള്ള സാധ്യത കൂടുതലാണ്. മാതാപിതാക്കളില്‍ ലഹരി വസ്തുക്കളുടെ ഉപയോഗം, ക്രിമിനല്‍ സ്വഭാവം എന്നിവ ഉള്ളവര്‍ക്ക് സാധ്യത കൂടുതലാണ്. അതുപോലെ തലച്ചോറിലെ ഇടത്-വലത് അര്‍ദ്ധഗോളങ്ങളുടെ പ്രവര്‍ത്തനത്തിലെ ഏകോപനമില്ലായ്മയും, ഫ്രോണ്ടല്‍ ലോബിലെ ഡോപ്പമിന്‍, നോര്‍ എപി നെഫ്രിന്‍ എന്നീ രാസവസ്തുക്കളുടെ പ്രവര്‍ത്തന വ്യത്യാസങ്ങള്‍, ഇത്തരം അവസ്ഥയുമായി ബന്ധപ്പെട്ടിരിക്കുന്നു. ഇത്തരം അവസ്ഥയോടുചേര്‍ന്ന് പഠനവൈകല്യം (Learning disability) സ്വഭാവ വൈകല്യം (Conduct Disorder) എന്നിവയും കൂടുതലായി കണ്ടുവരുന്നു.
പരിഹാരമാര്‍ഗങ്ങള്‍
രോഗാവസ്ഥയിലുള്ള വ്യക്തിയെയും മാതാപിതാക്കളെയും കണ്ട് സംസാരിച്ച് വിശദമായ ക്ലിനിക്കല്‍ പരിശോധനയിലൂടെയാണ് രോഗനിര്‍ണ്ണയം നടത്തുന്നത്. അധ്യാപകരില്‍ നിന്നും വിവരങ്ങള്‍ ശേഖരിക്കുന്നത് നല്ലതാണ്. രോഗാവസ്ഥയുടെ തീവ്രത അളക്കാന്‍ കോണേഴ്‌സ് അസെസ്‌മെന്റ് സ്‌കെയില്‍ (Conner's Assessment Scale) പോലുള്ള സൈക്കോളജിക്കല്‍ ടെസ്റ്റുകളും ഉപയോഗിക്കാം.
എ ഡി എച്ച് ഡി തലച്ചോറിലെ കോശങ്ങളുമായി ബന്ധപ്പെട്ട രോഗാവസ്ഥയാണ്. ഏഴ് വയസ്സിന് മുന്‍പ് രോഗലക്ഷണങ്ങള്‍ ആരംഭിക്കുന്നു.
മനഃശാസ്ത്ര ചികിത്സയും കൗണ്‍സിലിങ്ങും സംയുക്തമായി ഉപയോഗിക്കുന്നു. കുട്ടികളെ വളര്‍ത്തുമ്പോള്‍ ശ്രദ്ധിക്കേണ്ട കാര്യങ്ങളെകുറിച്ച് പറയുന്നത് (Parent Management Training) വളരെ ഉപകാരപ്രദമാണ്. അതുപോലെ സൈക്കോ എഡ്യൂക്കേഷന്റെ ഭാഗമായി ആരോഗ്യകരമായ കുടുംബാന്തരീക്ഷത്തിന്റെ പ്രാധാന്യവും കുട്ടികളോടുള്ള ശിക്ഷണ നടപടികള്‍ പരിഹാരമല്ലെന്നും ബോധ്യപ്പെടുത്തുന്നു. അധ്യാപകര്‍ക്കുള്ള ബോധവല്‍ക്കരണ ക്ലാസുകളും വളരെ പ്രയോജനം ചെയ്യുന്നു. ബിഹേവിയറല്‍ തെറാപ്പികള്‍ക്കൊപ്പം ചില സാഹചര്യങ്ങളില്‍ മനോരോഗ വിദഗ്ധന്റെ മേല്‍നോട്ടത്തില്‍ ഔഷധചികിത്സയും വേണ്ടിവന്നേക്കാം.
