ഫോട്ടോ അടിക്കുറിപ്പ്: കോട്ടയം സോഷ്യല് സര്വ്വീസ് സൊസൈറ്റിയുടെ നേതൃത്വത്തില് എസ്.എസ്.എല്.സി പരീക്ഷയില് മികച്ച വിജയം കരസ്ഥമാക്കിയ വിദ്യാര്ത്ഥികളെ ആദരിക്കുന്നതിനായി സംഘടിപ്പിച്ച ചടങ്ങിന്റെ ഉദ്ഘാടനം കോട്ടയം അതിരൂപത മെത്രാപ്പോലിത്ത മാര് മാത്യു മൂലക്കാട്ട് നിര്വ്വഹിക്കുന്നു. (ഇടത്തുനിന്ന്) ഫാ. സുനില് പെരുമാനൂര്, നിര്മ്മലാ ജിമ്മി, മരിയ ജോണ്, ലൗലി ജോര്ജ്ജ്, ബിന്സി സെബാസ്റ്റിയന്, ഫാ. മാത്യുസ് വലിയപുത്തന്പുരയില്, സരുണ് മാത്യു സജി എന്നിവര് സമീപം.
ലക്ഷ്യബോധവും മൂല്യങ്ങളും മുറുകെപ്പിടിച്ചുകൊണ്ട് ഉയര്ന്ന സ്വപ്നങ്ങള് സാക്ഷാത്ക്കരിക്കുവാന് യുവതലമുറയ്ക്ക് കഴിയണമെന്ന് കോട്ടയം അതിരൂപത മെത്രാപ്പോലിത്ത മാര് മാത്യു മൂലക്കാട്ട്. കോട്ടയം അതിരൂപതയുടെ സാമൂഹ്യ സേവന വിഭാഗമായ കോട്ടയം സോഷ്യല് സര്വ്വീസ് സൊസൈറ്റിയുടെ നേതൃത്വത്തില് എസ്.എസ്.എല്.സി പരീക്ഷയില് മികച്ച വിജയം കരസ്ഥമാക്കിയ വിദ്യാര്ത്ഥികളെ ആദരിക്കുന്നതിനായി കോവിഡ് മാനദണ്ഡങ്ങള് പാലിച്ചുകൊണ്ട് തെള്ളകം ചൈതന്യയില് സംഘടിപ്പിച്ച പൊതുസമ്മേളനത്തിന്റെ ഉദ്ഘാടനം നിര്വ്വഹിച്ച് സംസാരിക്കുകയായിരുന്നു അദ്ദേഹം. കഴിവുകളെ തിരിച്ചറിഞ്ഞ് സമൂഹ പുരോഗതിയിലും രാഷ്ട്ര നിര്മ്മാണ പ്രക്രീയയിലും യുവതലമുറ പങ്കാളികളാകണമെന്നും അദ്ദേഹം കൂട്ടിച്ചേര്ത്തു. കോട്ടയം ജില്ലാ പഞ്ചായത്ത് പ്രസിഡന്റ് നിര്മ്മലാ ജിമ്മി ചടങ്ങില് അദ്ധ്യക്ഷത വഹിച്ചു. കോട്ടയം മുനിസിപ്പല് ചെയര് പേഴ്സണ് ബിന്സി സെബാസ്റ്റ്യന്, ഏറ്റുമാനൂര് മുനിസിപ്പാലിറ്റി ചെയര്പേഴ്സണ് ലൗലി ജോര്ജ്ജ്, കോട്ടയം സോഷ്യല് സര്വ്വീസ് സൊസൈറ്റി എക്സിക്യൂട്ടീവ് ഡയറക്ടര് ഫാ. സുനില് പെരുമാനൂര്, അസി. ഡയറക്ടര് ഫാ. മാത്യുസ് വലിയപുത്തന്പുരയില് എന്നിവര് പ്രസംഗിച്ചു.എസ്.എസ്.എല്.സി പരീക്ഷയില് എല്ലാ വിഷയങ്ങള്ക്കും എ പ്ലസ് കരസ്ഥമാക്കിയ കെ.എസ്.എസ്.എസിന്റെ ഇടയ്ക്കാട്ട്, കൈപ്പുഴ, ഉഴവൂര്, കടുത്തുരുത്തി, കിടങ്ങൂര്, മലങ്കര, ചുങ്കം എന്നീ മേഖലകളിലെ സ്വാശ്രയസംഘാംഗങ്ങളുടെ കുട്ടികളെയാണ് ആദരിച്ചത്.
