കടലിലും ജലാശയങ്ങളിലും ഒരിക്കലും പ്ലാസ്റ്റിക് മാലിന്യം വലിച്ചെറിയരുതെന്നു ഫ്രാന്‍സിസ് മാര്‍പാപ്പ ആവശ്യപ്പെട്ടു. സമുദ്രസംരക്ഷണത്തിനു ലോകത്തില്‍ ഫലപ്രദമായ നിയമങ്ങളില്ലാത്തതു പരിതാപകരമാണ്. സമുദ്രങ്ങള്‍ മഹത്തായ ദൈവദാനങ്ങളാണെന്നും അവയെ ആകര്‍ഷകമായും മനോഹരമായും സംരക്ഷിക്കാന്‍ നമുക്കു ബാദ്ധ്യതയുണ്ടെന്നും പാപ്പ വ്യക്തമാക്കി.
ജലാശയങ്ങളെ സ്വകാര്യവത്കരിക്കുന്നത് അംഗീകരിക്കാനാവില്ലെന്നു മാര്‍പാപ്പ പറഞ്ഞു. ഈ പ്രകൃതിനന്മ ലഭ്യമായിരിക്കുക എന്നത് മനുഷ്യാവകാശമാണ്. അതിനെ നിഷേധിക്കാനാവില്ല. ജലാശയങ്ങളില്‍ അന്തമില്ലാത്ത വിധം പ്ലാസ്റ്റിക് ഒഴുകി നടക്കുന്നതും അനുവദിക്കാനാകില്ല. രാജ്യാതിര്‍ത്തികള്‍ക്കു പുറത്തുള്ള സമുദ്രങ്ങളില്‍ ഇതു തടയാന്‍ ഉത്തരവാദപ്പെട്ടവരില്ല. ഈ അടിയന്തിരസ്ഥിതിയെ നാം സജീവമായി നേരിടേണ്ടതുണ്ട്. -മാര്‍പാപ്പ വിശദീകരിച്ചു.
